ارګ په خپلې رسمي فیسبوک پاڼه کې لیکلي دي، چې د اریانا هوايي شرکت نوم بدلول یوه اوازه بولي.
دغه پاڼه د ولسمشر په نقل قول لیکي، چې شاوخوا ۳ اونۍ وړاندې هېواد مشر په هغه ناسته کې، چې د هوايي چلن خصوصي شرکتونو له مسولینو سره یې لرله ټینګار یې وکړ، چې اریانا د یوې ملي او معنوي پانګې په توګه د افغانستان له تاریخي هویت سره اړیکه لري او خوندي ساتل یې د حکومت کار دی.
دغه ناسته د (می په ۱۰مه) په ارګ کې شوې وه.
داسې راپورونه خپاره شوې وو، چې د هوايي چلن او ترانسپورټ وزارت د ولسمشر په حکم د اریانا هوايي شرکت نوم چې ۶۰ کلنه مخینه لري په "باخترـ افغان الوتنه" باندې واړه وي.
په ورته وخت کې د ترانسپورت او هوايي چلن وزارت په یوې خپرې شوې خبر پاڼه کې لیکلي دي، چې دغه وزارت د کورنیو الوتنو د ستونزو د حل له پاره د اریانا هوایي شرکت په اډانه کې باخترـ افغان الوتنې فعالوي او زیاتوي چې دغه کار په دې معنا نه دی، چې د اریانا نوم دې بدل شي.
د اریانا هوايي چلن شرکت نوم بدلونو په خوالو رسنیو کې د هېوادوالو سخت غبرګونونه راوپارول.
په ورته وخت کې د ولسي جرګي استازو او وتلو سیاسي څېرو په دې اړه خپل دریځ اعلان کړی و.
په دې ته ورته پېښه کې د کابل نړیوال هوايي ډګر نوم بدلول او د پخواني ولسمشر حامد کرزي نوم پرې اېښودل شو یو لړ غبرګونونه یې لرل.
