ارزگان ولایتی نینگ ایشانچلی امنیتی بیر منبعی نامی فاش بولمسلیک شرطی بیلن سلاموطندارگه بیرگن صحبتده ولایتدهگی ملی اردو کندکلریدن بیری نینگ 48 حربیسی اوتگن کیچه (شنبهدن یکشنبه) گه اوتر کیچهسی طالبلرگه قوشیلگن دیگن.
منبع، ارزگان مرکزی تیرینکوت و چوری منطقهسیده بیر یریم آیدن بیری طالبان تامانیدن قورشاووگه آلینگن ملی اردونینگ اوشبو حربیلری نهایتده محل اهالیسی واسطهچیلیگی بیلن اختیارلریده بولگن حربی جهاز بیلن طالبلرگه قوشیلگن دیدی.
ارزگان ولایتی والیسینینگ سوزلاوچیسی دوستمحمد نایاب، ملی اردونینگ بو حربیلری بیلن علاقهلری کیسیلگن و انه شو باعث ییتکرمه(رسانه)لرگه بو حقیده انیق معلومات بیریشیمیز ممکن ایمس دیگن.
لیکن، اتل 205 قول اردونینگ سوزلاووچیسی خانعلی هزاره، ملی اردونینگ بو ساندهگی حربیلری طالبلرگه قوشیلگنلیگینی رد قیلیب، حربیلر باشقه محلگه آلیب باریلیشی اوچون قرار آلینگن لیگینی تیلگه آلگن.
عین حالده، جنگری طالبلر تامانی ملی اردونینگ بیر قنچه عسکرلری بوتون حربی انجاملری بیلن بو حرکتگه قوشیلگن لیگینی ادعا قیلگن.
سونگی اون بیش کون ایچیده بو اوچینچی مرته ارزگان ولایتیده ملی اردو نینگ حربیلری طالبان صفیگه اوتهدی. حربی مخصصلرنینگ سوزلریگه کوره، ملی اردو حربیلری کیتمه – کیت طالبلرگه قوشیلیشی حکومت رسملری نینگ تفاوتسیز لیگیدن کیلیب چیقهدی.
