مملکت ملی قهرمانی ایناغهسی همده احمدشاه مسعود بنیادی نینگ باشلیغی احمدولی مسعود، بوگون کابلده بیر خبری انجمن اوتکزیب، بوندن ایکّی کون آلدین افغانستان جمهور رییسی محمداشرف غنی نینگ آتامراد – آقینه تیمیر یولی آچیلیشی ییغینده قیلگن نطق سوزیگه اشاره قیلیب، اساسی قانونگه موافق ملی قهرمانلیک لقبی رسمن احمدشاه مسعودگه بیریلگن، باشقه کیشیگه ایمس دیگن.
جمهور رییسغنی تیمیر یول آچیلیشی ییغینده امانالله خاننی ملی قهرمان دییه تیلگه آلگن ایدی.
اوشبو ییغینده جمهور رییسغنی نینگ بو سوزلرینی تنقید آستیگه آلگن جناب مسعود، کیشی نینگ لقبی تیلگه آلینیشده قونت بولیشی کیره ک یا- ده مملکت بیرینچی کیشیسی نینگ بو قبیل سوزلری تیکشیریلیشی لازم دیگن. جناب مسعودگه کوره،امانالله خانگه اختصاصلشتیریلگن لقب «غازیلیک» دیگن.
احمدشاه مسعود بنیادی نینگ باشلیغی، بولر مملکت شخصیتلریگه حرمت قیله دیلر و مقابل تامان هم مملکت نفوذلی و ملی شخصتلریگه حرمت قیلیشی ضرورلیگی اوستیده تاکید ایتگن.
ملی قهرمان ایناغهسی، هر حالده جمهور رییس نینگ بو سوزی اَتهیین بولیشی بولمسلیگیدن قطع نظر بو مسالهنی حکومت آرقهلی یاروتیشی ضرور دیگن.
جناب احمدولی مسعود، بو قبیل خطالر اوز حالیده خلق احساساتی بیلن اوینش بو ایسه حاضرگی کونده مملکت منفعتی اوچون سلبی تاثیر قالدیره دی دیگن.
شونینگدیک جناب مسعود «ملی قهرمان» اساسی قانون، جمهور رییس فرمانی و افغانستان لویه جرگهسی قرار اساسیده احمدشاه مسعودگه بیریلگن دیدی.
بو توغریده جمهور رییس نینگ فکرینی اورگهنیش اوچون سعی و حرکت آلیب باردیک، اما جمهور رییسلیک سرایی نینگ مطبوعات بولیمی مسووللری بو توغریده جواب بیرمهدی.
