اوتگن هفته پنجشنبه کونی ملی بیرلیک حکومتی اجراییه باشلیغینینگ کوتیلمهگن پیتده تیلگه آلگن اظهاراتی خبری آژانسلرنینگ اساسی سوژهسیگه ایلندی.
بیر قطار سیاسی تحلیلچیلر حکومت رهبرلری اورتهسیدهگی قرمهقرشیلیکلر تیزلیکده حل ایتیلمهگن حالده، « حکومت اورتهدن» کیتهدی دیگنلر.
کابلده یاشلر خلق ارا کونی مناسبتی بیلن اوتکزیلگن ییغینده نطق سوزلهگن حکومت اجراییه باشلیغی جمهور رییس غنینی سابقهسی بولمهگن روشده تنقید آستیگه آلدی.
بحث مذاکره قیلیشده حوصلهسی بولمهگن کیشی جمهور رییسلیک سرایی اوچون لایق ایمس دیگن. عبداللهنینگ سوزلریگه عکسالعمل بیلدیرگن جمهور رییسلیک سرایی، جناب عبداللهنینگ بو سوزلری دولتچیلیک روحیهسیگه ماس ایمس لیگینی بیلدیردی.
سیاسی تحلیلچی جاوید کوهستانی نینگ سلاموطندارگه ایتیشیچه، اخیرگی وقتلرده جمهور رییسلیک سرایی هر قندهی وسیلهدن فایدهلهنیب اجراییه رییسنی طرفدارلری ایچیده منزوی قیلیشگه حرکت قیلگن.
جناب کوهستانینینگ سوزلریگه قرهگنده، جمهورنینگ کیشیلرنی ایشگه آلیشی همده شخصلرنی ایشدن آلیش اوچون بیر تامانلمه قیلگن حرکتی اجراییه ریاستیگه اتفاقداش شخصلرنی ملی بیرلیک حکومتی وجودگه کیلیش اوچون امضالنگن شرطنامهنینگ مادهلری بیرمه بیر عملگه آشیریلیشی اوچون مجبور قیلگن.
جمهور رییس غنی کیلیشوونینگ متنی تطبیق ایتیلیشی اوچون ایش کورمهگن حالده، عبدالله حکومتدن چیقیشی ممکن.
جناب کوهستانیگه کوره، بو ضدیتلر حاضر حل بولمهگن تقدیرده، ترکمنستاندن کیلتیریله دیگن 500 کیلوولت برق بامیان یولیدن اوتکزیلیشی اوچون وجودگه کیلگن یاروغلیک حرکتی باشقه تاماندن جمهو رییسنینگ بیرینچی اورین باسری جنرال دوستمنینگ ناراضیلیگی دنیا جماعه چیلیگینینگ افغانستان حکومتیگه کورستهجک یاردملری کیسیلیب مملکت بحرانگه کیتیشی ممکن.
باشقه بیر سیاسی تحلیلچی کابلخان تدبیرنینگ سلاموطندارگه، قیینچیلیک جمهور رییس غنی بیلن عبداللهنینگ معماسی ایمس، بلکه بو قیینچیلیکنی غنی بیلن عبدالله اطرافیده ییغیلگن فرصت طلب شخصلردن کیلیب چیقدی دیگن.
معین شخصنینگ نامینی تیلگه آلمهگن جناب تدبیر، مذکور شخصلر سیلاولر آلدی ترغیبات جریانیده اجراییه ریسی و جمهور رییسگه اوزلرینی دم توزهتگنلر دیگن.
بو قبیل جنجللر افغانستاننینگ بیر قنچه ولایتلری عملده دولت قوراللی مخالفلری آرقهلی جدی تهدیدگه روپه ره بولیب تورگن پیتده یوز بیرماقده. مملکتنینگ بیر قنچه اهالیسی افغانستان حاضرگی وضعیتی نی نظرده توتیب، حکومت رهبرلری اورته لریدهگی معماگه پایان بیریشنی سوره گنلر.
