نماینده‌لر کینگشی باشلیغی عبدالرؤوف ابراهیمی‌نینگ، مملکت جمهور رییسی و اجراییه باشلیغی‌گه خطاب ایتیشیچه، حاضرگی وضعیت‌نی باشقره‌آلمه‌گن صورتده، کوچسیزلیک‌لرینی تن آلیش‌لری لازم.
جناب ابراهیمی‌نینگ، (دوشنبه کون) نماینده‌لر کینگشی ییغینیده ایتیشیچه، ملی بیرلیک حکومت تشکیل ایتیلگنی‌دن اون آی اوتیب بارماقده، بیراق اوشبو حکومت حاضرگچه خلق ایستک‌لری‌گه جواب بیره‌آلمه‌گن.
ابراهیمی‌نینگ کوپه‌یتیریشیچه، حکومت ایسته‌گن صورتده، اولر حکومت رسمی‌لری و قوم بویوک‌لری حضوریده ملی جمغرمه تشکیل ایتیب، خلق قیین‌چیلیگی‌گه ییچیم یول تاپه‌دیلر.
شونده‌ی حالده، پارلمان اعضالری حکومت باشلیغ‌لریدن تنقید قیلیب، کابینه وزیرلرینی فسادگه عیب‌له‌دی. اولرگه کوره، حکومت وزیرلریدن بیرقطاری‌نینگ فعالیت‌لری تونیق ایمس دیر و کوپینچه پیت‌لرده قانونی صلاحیت‌لریدن ناقانونی صورتده ایش آله‌دیلر.
پارلمان اعضالریدن بیری منورشاه بهادری‌نینگ ایتیشیچه، وزیرلیک‌لر قومی و سمتی ایس بیره‌دی و ینگی تعیین بولگن وزیرلر اوز ایستک‌لری بیلن ایشچیلرنی وظیفه‌دن چیتنلتیریب، اوز قرینداشلرینی جایلشتیره‌دی.
شونینگ‌دیک، جناب بهادری، بیرقطار وزیرلر تامانیدن شرط نامه‌لر خصوصیده پاره آلینیشی‌دن خبر بیردی.
انه شونده‌ی، پارلمان اعضالریدن باشقه بیری چمن‌شاه اعتمادی‌نینگ ایتیشیچه، بیر آیدن بویان یاشلر نیچه مرته ایش‌سیزلیک باعث، ناراضیلیک نمایش‌گه قول اورگن. شونینگ‌دیک، اونینگ آگاه‌لنتیریشیچه، بو یاشلرگه ایش زمینه‌سی یره‌تیلمه‌گن صورتده، داعش و طالب‌دیک تروریستی گروه‌لر وضعیت‌دن فایده‌لنیب و اولرنینگ گروه لری‌گه جذب ایتیشی ممکن.
پارلمان نماینده‌لری غزنی مرکزی تورمه‌سیده طالب‌لرنینگ هجومی‌گه قرشی‌لیک کورستدی
پارلمان نماینده‌لری، امنیتی رسمی‌لرنی غزنی مرکزی تورمه‌سیده طالب‌لرنینگ ریجه‌لنگن هجومی‌گه قولی بارلیک‌که عیب‌له‌یدی. غزنی ولایت نماینده‌لری‌نینگ ایتیشیچه، کشفی اداره‌لر مسؤول کیشی‌لرنی واقعه یوزبیریشی‌دن آگاه لنتیرگن، بیراق مسؤول کیشی‌لر بو توغریده دقت قیلمه‌گن. اولر بو واقعه‌گه ایچکی ایشلر وزیرلیگینی عیب‌دار بیله‌دی.
دوشنبه کونگی ییغینده، نماینده‌لر کینگشی باشلیغی، مملکت ایچکی ایشلر وزیری‌نینگ مجلس‌ده چقیریلیشینی سوره‌دی.
اوتگن یکشنبه کیچه‌گی طالبلر تامانیدن غزنی مرکزی تورمه‌سیده‌گی زندانیلردن 355 کیشی اوشبو گروه آرقه‌لی قاچیریلگن. مذکور هجوم اوتگن یکشنبه کیچه ساعت 11 طالب‌لرگه باغلیق 6 کیشی حربی کییم و موتر بیلن قماقخانه‌ده کیریب باریشلری بیلن بولگن.
اولر امنیتی کوچلرگه قرشی قیسقه اوروش اوتکزیب، برچه توسیقلردن اوتیب، تورمه ده‌گی زندانیلرنی توتقونگه آلگن‌لر. اوندن کیین، طالبلر زندانیلردن تورمه‌نی ترک ییتیب، اولر بیلن بیرگه کیتیش‌نی ایسته‌گن‌لر.
عین حالده، ایتیلیشیچه، هجوم‌دن بیرکون آلدین (شنبه کون) ملی امنیت کوچلری، طالب‌لرنینگ ییریک اعضالریدن 20 ته‌سینی غزنی مرکزی تورمه‌سیدن نامعلوم ییرگه انتقال بیرگن ایکن. انه شو اساس، امنیتی کوچلر آلدیدن طالب‌لرنینگ ریجه‌لنگن هجومی‌دن خبردار ایکنلیگی ایتیله‌دی.
شونده‌ی حالده، غزنی ولایتی پارلمان‌ده‌گی نماینده سی عارف رحمانی، مذکور ولایت پولیس قومندانی‌نینگ دقت‌سیزلیک‌که عیب‌لب و وظیفه‌سیدن چیتلنتیریلیشینی سوره‌دی.
طالبلر گروهی بوندن آلدین هم بونده‌ی هجوم‌لرنی عمل‌گه آشیرگن. 1387- ییل جوزا آیی‌نینگ 24 ده اوشبو گروه قندهار مرکزی تورمه‌سینی تیشیب، کمیده بیرمینگ محبوس‌نی مذکور تورمه‌دن قاچیرگن‌لر.
