قندوز ولایتی امام صاحب تومنینینگ یشاوچیلری، افغانستان بیلن تاجیکستان اورتهسیدهگی چیگرهده تشقی عصیانچیلر موجودلیگی خصوصیده خواطر بیلدیرهدی.اوشبو یشاوچیلر سلاموطندار بیلن اوتکزگن صحبتیده ایتیشیچه، تشقی عصیانچیلر سونگی کونلرده قندوز ولایتی امام صاحب تومنینینگ اورمانلی منطقهسیده یاشلرنی انتحاری هجوم اوچون تربیهلب و یول یانیده ییرلشتیرهدیگن ماین توزهتهدی.
امام صاحب یشاوچیلریگه کوره، امنیتی مسؤوللرنینگ پوستهلری اورمانلی منطقه یقینیده قرار تاپگن و بو حرکتلرنی کوریب هیچ نرسه دیمهیدی.
مذکور تومن یشاوچیلریدن حاجی محمد امین و نور محمدنینگ، چیگرهیی منطقهلر امنیتی وضعیتی توغریسیده اوتکزیلگن ییغینده ایتیشیچه، تشقی عصیانچیلر سونگی آلتی آیده افغانستان بیلن تاجیکستان اورتهسیدهگی چیگره اینیقسه اورمانلی منطقهده کینگ شکلده فعالیت قیلگن. اولر، عصیانچیلر سانی توغریسیده هیچ نرسه دیمهگن، بیراق ایتیشیچه، جنگریلردن کوپینچهسی، پاکستان، قزاقستان، تاجیکستان و اوزبیکستانلیکلر دیر.
ایتیلیشیچه، امام صاحب تومنی بیلن اورمانلی منطقه قتناو یولی بوتونلهی یاپیلگن و عصیانچیلر بو یولدن کیمسهنی اوتگنی قویمهیدی.
عین حالده، قندوز ولایتینینگ سرپرستی حمدالله دانشی، چیگرهیی منطقهلرده امنیتی قیینچیلیک بولگنینی تصدیقلب ایتیشیچه، امنیتی کوچلر تامانیدن تیزلیکده اوشبو منطقهلرده کینگ عملیات یولگه قوییلهدی. جناب دانشیگه کوره، چیگرهیی منطقهلر امنیتینی سقلش افغانستان دولتی اوچون جوده مهم و دولت هیچ بیر گروهگه بو منطقهلرنی تینچسیز قیلیشگه رخصت بیرمهیدی.
بوندن آلدین، امام صاحب تومنی باشلیغی امانالدین قریشینینگ سلاموطندارگه ایتیشیچه، کونسایین افغانستان بیلن تاجیکستان اورتهسیدهگی چیگرهده، تشقی عصیانچیلر رقمی کوپیهدی. جناب قریشیگه کوره، کمیده ایکی یوز عصیانچی قندوز ولایتینینگ، «امام صاحب»، و «دشت ارچی» تومنلریگه تیگیشلی منطقهلرده فعالیت قیلهدی.
امام صاحب تومنی اهالیسینینگ ایتیشیچه، پاکستان حربیسی تامانیدن وزیرستانده اوتکزیلگن عملیاتدن کیین، قوراللی جنگریلر افغانستانگه کیلگن و عایله اعضالری تخار، قندوز و بدخشان ولایتلری چیگرهلریده حیات کیچیرهدی. بیراق یشاوچیلر ایشانچیگه کوره، وزیرستان اوروشیدن قاچگن جنگریلر محلی لهجهلرگه سوزلهیدی و احتمال باریچه اولر تشقی عصیانچیلر گروهسیدن ایمس دیر.
قندوز ولایتینینگ امام صاحب تومنی تاجیکستان بیلن چیگره داش دیر و اورمانلی منطقه آمو دینگیزی یقینیده جایلشگن، بوندن آلدین اوشبو منطقه مخدره ماده قاچاقی اوچون اونوملی یول دییلردی.
