افغانستان و پاکستان ایشلری بوییچه آلمان ایلچیسی و خاص نماینده‌سی نینگ ایتیشیچه، افغانستان تینچلیک لایحه‌سی بوییچه آمریکا تشقی ایشلر وزیرلیگی‌نی خاص نماینده‌سی زلمی خلیلزاد، طالبان گروهی بیلن اوتکزگن آلتینچی دور مذاکره‌سیدن سونگ، هیچ بیر نتیجه گه ایریشمه‌گن و آلمان جناب خلیلزادنینگ ایسته‌گی گه افغانستان تینچلیک سوزلشوولریده یاردم و همکارلیک قیله‌دی.
بوگون «چهارشنبه» کابل‌ده تینچلیک جریانی و بو جریانده عیاللر رولی خصوصیده یولگه قوییلگن مصلحتی ییغینده افغانستان و پاکستان ایشلری بوییچه آلمان ایلچیسی و خاص نماینده‌سی مارکس پوتزل نینگ ایتیشیچه، آمریکا و طالبان گروهی نماینده‌لری آره‌سیده اوتکزیلیشی کوتیلگن 7- دور تینچلیک سوزلشوولریده، آمریکا کوچلری افغانستاندن چیقیشی، ترورچیلیک‌که قرشی کوره‌ش، آتیش‌کیسین و افغانستانلیک‌لر ارا تینچلیک سوزلشوولری باشله‌نیشی توغریسیده بحث قیلینه‌دی.
شونینگدیک، آلمان ایلچیسی سوزلری دوامیده تینچلیک سوزلشوولریده اوتگن 18 ییل یوتوقلری سقله‌نیشی اوستیگه تأکید قیلگن.
عین حالده، مملکت تشقی ایشلر وزیرلیگی‌نی سیاسی اورین باسری ادریس زمان، قطرده آمریکا و طالبان گروهی نماینده‌لری آره‌سیده اوتکزیلگن 6- دور تینچلیک سوزلشوولرینی نتیجه‌سیز دیب ایتیشیچه، اوشبو دور سوزلشوولری محتوا نقطه‌ی نظردن قیین‌چیلیک‌لر بیلن بیرگه ایکن. مملکت تشقی ایشلر وزیرلیگی‌نی سیاسی اورین باسری، تینچلیک سوزلشوولریده آلمان فعال اشتراک قیلیشی‌نی سوره‌گن.
باشقه تاماندن، کابل‌ده خبری بیر ییغین اوتکزگن جمهورلیک ریاستی نامزدی فرامرز تمنانینگ ایتیشیچه، مملکت‌ده اوروش دوام ایتیب تورگن بیرچاغده، طالبان محبوسلری قوییب یوباریلیشی افغانستان خوفسیزلیک مسئله‌لری مدیریتی‌ده جدی تناقض بولگنینی کورسته‌دی.
جناب تمنانینگ ایتیشیچه، طالبان محبوسلری قوییب یوباریلگن صورتده، اوروش میدانلریده آتیش‌کیسین اعلان قیلینیشی کیره‌ک و مملکت فرزندلری نیچه کیشی نینگ منفعتی اوچون اوروش میدانلریده هلاک ایتیلمه‌سین‌لر.
ایتیش کیره‌ک کیم، سونگی نیچه کونده طالبان محبوسلری قوییب یوباریلیشی جدی خواطر و تنقیدلرگه سبب بولگن.
جمهور رئیس غنی تامانیدن بیریلگن فرمان اساسیده، اوتگن نیچه کون جریانیده مملکت قماقخانه‌لریدن طالبان گروهی گه تیگیشلی کمیده 200 محبوس قوییب یوباریلدی.
شو توغریده…
قطرده اروپایی‌لیک رسمی‌لر بیلن طالبان نماینده‌لری‌نینگ اوچره‌شیش‌لری کوپه‌یگن
