سیلاولر ایرکین کیمسیونینینگ سابق باشلیغی یوسف نورستانینینگ ایتیشیچه، مذکور کمیسیوننینگ ینگی باشلیغی یالغیز کمیشنرلرنینگ آوازی اساسیده تََنلنهدی و قانون اساسیده، هیچ بیر تشقی قدرت کمیسیون باشلیغینی تَنلهآلمهیدی.
سیلاولر قانونی، کمیسیوننینگ بلند مرتبهلی رسمیلری تعیین ایتیلیشی خصوصیده، بوندهی بیر حکم صادر ایتگن: «سیلاولر کمیسیونینینگ باشلیغی، اورین باسری و کاتبی عضویتینی قولدن بیرگن تقدیرده، سیلاولر قانونینینگ 5- مادهسی و 2- فقره حکمی اساسیده، خذمت دورهسی قالگن زمانی اوچون، کمیسیون اعضالرینینگ اورتهسیده قیتهدن سیلاو یولگه قوییلهدی.»
بوگون (دوشنبه) میدیا حضوریده سوزگه چیقگن جناب نورستانی، کوتیلمهگن حالده استعفا بیرگنی توغریسیده اشاره قیلیب ایتیشیچه، بو قرار شخصی بیر عمل بولگن و بونی آرقهسیده هیچ بیر معامله یا- ده دسیسه بولمهی و فشار آستیگه هم آلینمهگن.
شونینگدیک جناب نورستانی، سیلاولر کمیسیونینینگ ریاستی اوچون لایق و ظرفیتگه ایگه بولگن بیر کیشی تعیین ایتیلیشی و سابق تنلش کمیتهسی عیال کمیشنرلردن بیرینینگ اوشبو پستگه تعیین ایتیشینی تکلیف قیلگن. شونینگدیک او، سیلاولر تیزیمیگه اصلاحات کیریتیلیشی، برقی کیملیکلر ترقهتیلیشی، سیلاو قانونلریدن بیرقطاری قیته تیکلهنیشی و آواز بیریش مرکزلری کمَیتیریلیشینی جوده مهم دیب بیلهدی.
جناب نورستانینینگ قوشیمچه قیلیب ایتیشیچه، سیلاولر ایرکین کمیسیونی ایکی رهبر اورتهسیده بولینگن تقدیرده، مملکت ایلگریدن کوره یامانراق قیینچیلیککه روپهره بولیشی ممکن.
سیلاولر کمیسیونیدهگی موجود قیینچیلیکلر
سیلاولر ایرکین کمیسیونینینگ سابق باشلیغی، سیلاولر کمیسیونینینگ ایشچیلری و اعضالرینینگ قیینچیلیکلری توغریسیده اشاره قیلیب ایتیشیچه، مذکور کمیسیون اعضالریدن کمیده 300 کیشی تورت آیدن آیلیکلرینی قولگه کیریتمهگن. اونینگ کوپهیتیریشیچه، بو مسئلهنی جمهور رییس بیلن شریک قیلیب و اوشبو ایشچیلرنینگ آیلیکلری تیزلیکده توللنمهگن صورتده، اولر کمیسیون دروازهسینینگ یاپیشینی ایتگن.
ایتیش لازم، جمهور رییس غنی، جناب نورستانی بیلن اوچرهشگن چاغیده، کمیسیون اعضالرینینگ برچه آیلیکلرینی تیزلیکده توللب و سیلاولر کمیسیونینینگ ایچیدهگی قیینچیلیکلرنی حل ایتیش اوچون سوزبیرگن.
