طالبانو پرون د «الفتح» په نوم د افغان او بهیرنیو ځواکونو پرضد پسرلني جنګي عملیات اعلان کړل.
د طالبانو دغه اعلان په اړه افغانحکومت کلک غبرګون وښود.
د ارګ یوې خبرپاڼې د طالبانو پسرلنیو عملیاتو پیل په غبرګون کې لیکلي چې افغانحکومت د طالبانو دغه ډول اعلان د هغوی د نامشروع جګړې دوام نښه بولي او په سختو ټکو یې غندي .
خبر پاڼه کې وړاندې لیکل شوي، طالبان داسې مهال جنګي عملیات اعلانوي چې د افغانحکومت په نوښت او ټینګار په افغانستان کې د تپل شوې جګړې د پای ته رسولو لهپاره هڅې ګړندۍ کړي او هم طالب او امریکايي پلاوي پر مخامخ خبرو بوخت دي.
د ارګ په خبرپاڼې کې یو ځل بیا له طالبمشرانو غوښتل شوي چې له جګړې لاس واخلي او د افغانستان له دولت سره د سولې خبرو ته کېني.
دغهراز، د طالبانو جګړهییزو عملیاتو اعلان د افغانسولې لهپاره د امریکا بهرنیو چارو وزارت ځانګړي استازي زلمي خلیلزاد هم کلک غبرګون ښودلی او هغه یې په سختو ټکو غندلي دي.
ښاغلي خلیلزاد پر ټویټر لیکلي چې د امریکا د حکومت په استازیتوب د طالبانو پسرلنیو بریدونو اعلان غندي.
ده پر پاکستان او قطر هم غږ کړی چې په افغانستان کې د سولې راوستلو لهپاره د جګړې په موخه د طالبانو دغه اعلان وغندي.
ښاغلی خلیلزاد پر خپل ټویټر لیکي: «پهداسې حال کې چې افغانان د خپلمنځي خبرو لهپاره سره راټول شي او ګډ هېواد جوړ کړي، د طالبانو دغه اعلان ښيي چې دوی په تېره تیاره کې بند پاتې دي. د جګړې ډګر ډېر طالب د دوی د ځېنو مشرانو په ګډون د دغه اعلان مخالفت کوي.»
ده ویلي، طالبانو پهدې اعلان سره وښودله چې دوی د افغانانو د غوښتنو خلاف دي او د زیاتو جګړییزو بریدونو اعلانول د سولې له هلو ځلو سره مرسته نه کوي.
ښاغلي خیلیلزاد لیکي، دغه بریدونه به نوره مرګژوبله رامنځته کړي او د سولې هلې ـ ځلې به له ستونزو سره مخ کړي.
په افغانستان کې د غوڅ ملاتړ ځواکونو هم د جنګي عملیاتو په اړه د طالبانو اعلان په غبرګون کې جګړې ته چمتووالی ښودلی.
د غوڅ ملاتړ ځواکونو ویاند دف بټلر وايي، طالبانو د سولې پر ځای جګړه غوره کړې چې دوی هم د دې ډلې پر ضد جګړې ته پوره چمتووالی لري.
د ښاغلي بټلر په وینا، د دغه ماموریت مشرتابه شورا غړي سره جرګه شوي او یو ځل بیا له افغان امنیتي ځواکونو خپل ملاتړ اعلانوي.
د غوڅ ملاتړ ځواکونو ویاند زیاتوي، سره لهدې چې تېرو ۴۰ کلونو کې سولې ته په رسېدلو کې د افغانستان لهپاره فرصت رامنځته شویو؛ خو په خبره یي، طالبانو تاوتریخوالی غوره کړ.
طالبانو تر اوسه د زلمي خلیلزاد او غوڅ ملاتړ ماموریت ځواکونو څرګندونو په اړه غبرګون نهدی ښودلی؛ خو د خپل اعلان پر لومړۍ ورځ (پرون) یې د ټول هېواد په کچه د ۹۳ بریدونو دعوه کړېوه.
ورته مطالب:
