.jpg)
یوه امریکايي څېړونکي توماس جانسون په افغانستان کې د تېرو درېوو ولسمشریزو ټاکنو په اړه په خپل څېړنیز راپور کې یادې ټاکنې له ستونزو او درغلیو ډکې وبللې.
نوموړي نن په کابل کې د سیمهییزو مطالعاتو مرکز له لوري په جوړې شوې غونډې کې د وېډیويي کنفرانس له لارې د خپلو څېړنو ۱۰۱ مخیز راپور وړاندې کړ چې پهکې د تېرو ټاکنو نیمګړتیاوې او د راتلونکیو هغو لپاره وړاندیزونه شامل وو.
د ټاکنیز سېسټم سمون، د سیاسي ګوندونو پیاوړتیا او د ټاکنو پروسې ښه څار، هغه مهم وړاندیزونه وو چې د جانسون په څېړنیز راپور کې ورته ځای ورکړل شوی و.
په همدې حال کې د ټیفا رییس نعیم ایوبزاده هم تېرې ټاکنې له ستونزو ډکې وبللې او ټینګار یې وکړ چې د راتلونکیو ټاکنو روڼوالي لپاره باید د ټاکنیزو کمېسیونونو ولایتي دفترونو ته ډېر واک ورکړل شي.
نوموړي د نوملیکنې او رایورکولو بهیرونو بایومټریک کول، د عامه پوهاوي ډېروالی او په کمېسیون کې د مسلکي کسانو ګومارل هم مهم وبلل چې باید د راتلونکیو ټاکنو پرمهال ورته پام وشي.
د ایوبزاده په وینا، د سولې ناڅرګند برخلیک هم پر راتلونکیو ولسمشریزو ټاکنو سیوری غوړولی او که اوسنی وضعیت همداسې دوام وکړي، ښايي یادې ټاکنې پر ټاکلې نېټې و نهشي.
د ټیفا مسوول وايي، د ۲۰۱۴ کال ولسمشریزو ټاکنو پرمهال یوه نوماند ۵۰+۱ رایې پوره کولې او دویم پړاو ته یې د تللو اړتیا نه وه او دوی پهدې اړه یو راپور هم چمتو کړی و، خو د ځینو ګواښونو له امله یې خپور نهکړ.
ایوبزاده زیاتوي، په یاد راپور کې داسې سندونه وو چې په هرات، بدخشان او ځینو نورو ولایتونو کې دویم پړاو ته د ولسمشریزو ټاکنو تللو لپاره په لوی لاس زمینه برابره شوه.
بلهخوا د سیاسي چارو شنونکی قمرالدین صدیقي وايي، افغانان اوس پر ټاکنو او د سولې پر پروسې بې باوره شوي او که افغان حکومت او نړېواله ټولنه ورته پام و نهکړي، کېدای شي هېواد د کړکېچ خوا ته لاړ شي.
دا په داسې حال کې ده چې تر دې وړاندې هم د سولې او ولسمشریزو ټاکنو او پایلو په اړه اندېښنې ښودل شوې وه.
