افغانستان بوییچه بیرلشگن ملت‌لر تشکیلاتی نینگ اورین باسرلیک هیأتی یا-ده یونامانینگ اعلان قیلیشیچه، سیلاو جریانی‌نی هدف گه آلگن هجوملر نتیجه‌سیده 458 تینچ اهالی قربان بولگن و بو جمله‌دن 85 کیشی هلاک و باشقه 373 کیشی یره‌لنگن.
اوشبو اداره نینگ معلوماتی گه کوره، بو آره‌ده یالغیز آواز بیریش کونی 2019- ییل، 28- سپتامبرده، 277 تینچ اهالی قربان بولگن و بو جمله‌دن 28 کیشی هلاک و باشقه 249 کیشی یره‌لنگن. تینچ اهالی قربانلریدن بیر قسمی نی باله‌لر تشکیل بیره‌دی.
بوگون «سه‌شنبه، 23- میزان» مذکور اداره تامانیدن ترقه‌تیلگن خاص گزارش‌ده سیلاو جریانیده تینچ اهالی گه قرشی زوروانلیک‌لرنینگ نتیجه‌سی اینیقسه افغانستان جمهورلیک ریاست سیلاوی برهم اوریلیشی اوچون طالبان نینگ قصدی تهدیدلری و زوروانلیک‌لری توغریسیده تفصیلات بیریلگن.
افغانستان بوییچه بیرلشگن ملت‌لر تشکیلاتی نینگ اورین باسرلیک دفتری نینگ کوپه‌یتیریشیچه، بو گزارش ده سیلاو برهم اوریلیشی اوچون طالبان تامانیدن اویوشتیریلگن هجوملرده تینچ اهالی گه ییتیشگن زیاندن مستند آلیش گه علاوه، سیلاوگه عاید تینچ اهالی قربانلریدن 80% گه سبب بولگن.
اوشبو گزارش‌ده افغانستان بوییچه بیرلشگن ملت‌لر تشکیلاتی نینگ خاص نماینده‌سی تدامیچی یاماموتودن نقل قیلینیشیچه، «اوشبو هجوملر طالبان تامانیدن ترقه‌تیلگن اعلامیه بیلن بیرگه باشله‌نیب و بو مسئله سیلاو جریانی برهم اوریلیشی و یشاوچیلرنینگ قانونی حقلریدن محروم قیلیش اوچون طالبان نینگ قصدی حرکتی نی کورسته دی.»
شونینگدیک، جناب یاماموتونینگ ایتیشیچه، «آواز بیرووچیلر، سیلاو ایشلاوچی‌لری، کمپاین قیلووچی‌لر، سیلاو توپلم‌لری و آواز بیریش مرکزلرگه قرشی قصدی زوروانلیک‌لر کیچیریلمس دیر.»
افغانستان بوییچه بیرلشگن ملت‌لر تشکیلاتی نینگ خاص نماینده‌سی گه کوره، «ملکی جمعیت گه قرشی کینگ و سیستماتیک هجوملر انسانیت گه قرشی جنایت سنله‌دی و شبه سیز بیرلشگن ملت‌لر تشکیلاتی اونی قاره‌لیدی.»
شو توغریده…
یوناما بایومتریک‌لی آوازلر سنه‌لیشیدن حمایت بیلدیردی
