افغانستان تینچلیک لایحهسی بوییچه آمریکا تشقی ایشلر وزیرلیگینی خاص نمایندهسی زلمی خلیلزاد و طالبان نمایندهلری آرهسیده بولگن 9- دور تینچلیک سوزلشوولری 8- کون گه کیردی.
قطرده طالبان سیاسی دفتری سوزلاوچیسی سهیل شاهین نینگ ایتیشیچه، مذکور گروه و آمریکا نمایندهلری نینگ 9- دور سوزلشوولرینی 7- کونیده اساسی کیلیشمهلر بولگن و بو سوزلشوولر بوگون هم دوام ایتهدی.
جناب شاهین نینگ اوز توییتر صحیفهسیده یازیشیچه، 9- دور نی 7- کونیده مذکور گروه نینگ ییغینی بوگون ایرتهلب ساعت 2:30 گچه دوام ایتگن و بو سوزلشوولرده افغانستان تینچلیک لایحهسی بوییچه آمریکانی خاص نمایندهسی زلمی خلیلزاد، قطرده طالبان سیاسی دفتری باشلیغی ملابرادر و مذکور گروه نینگ اورین باسری اشتراک قیلیشگن.
سهیل شاهین نینگ ایتیشیچه، اساسی موضوعلر اوستیگه کیلیشمهلر بولگن و ایرته توشدن کیین هم ییغین اوتکزیشلری ممکن.
شونینگدیک، قطرده طالبان سیاسی دفتری سوزلاوچیسی نینگ ایتیشیچه، اوتگن کون سوزلشوولریده ایریم کیلیشمهلر یوز بیرگن، لیکن بو توغریده آرتیقچه معلومات بیرمهگن.
عین حالده، آمریکا حربی کوچلری نینگ باشلیغی جنرال جوزف دانفورد، اوتگن کون مذکور مملکت نینگ مدافعه وزیری مارک اسپر بیلن اوتکزگن قوشمه خبری ییغینده ایتیشیچه، آمریکا عسکرلری افغانستاندن چیقیشی توغریسیده آمریکا و طالبان گروهی نینگ هرقندهی کیلیشووی، افغانستان نینگ امنیتی وضعیتی گه باغلیق بولهدی.
جناب دانفوردگه کوره، آمریکا عسکرلری افغانستان نینگ خوفسیزلیک کوچلری ترورچیلیککه قرشی کورهش خصوصیده ییترلیچه کوچ گه ییتیشگونگهقدر افغانستانده قالیشلری ممکن.
عین حالده، افغانستان بوییچه آمریکا ایلچیسی جان بس، سلام مخابراتی ترماغی هدف گه آلینیشی توغریسیده طالبان نینگ تهدیدلریگه اشاره قیلیب ایتیشیچه، بو گروه بیر تاماندن تینچلیک طلب قیلهدی، بیراق باشقه بیر تاماندن مخابراتی ترماقلرنی هدف قرار بیرهدی.
کابلده آمریکا ایلچیسی نینگ اوز توییتر صحیفهسیده یازیشیچه، «طالبان تینچلیک طلب قیلیب و مذاکره گه یول آچهدیگن بیر کیلیشووگه یقینلشگن؛ بیراق عین دمده، افغانستان اهالیسی فایدهلنهدیگن مخابراتی ترماقلر و باشقه قوریلمهلرنی ویران قیلیشهدی.»
طالبان گروهی گه کنایه شکلده جان بس نینگ ایتیشیچه: «بیز و افغانستانلیک شریکلریمیز طالبان نینگ سوزلریگه قولاق سالیب و اولرنینگ قیلگن ایشلرینی کورهیلیک.»
آمریکا و طالبان نمایندهلری آرهسیده بولگن 9- دور تینچلیک سوزلشوولری اوتگن کون یکونلنیشی خصوصیده قرار قیلینگن ایدی، بیراق بو سوزلشوولر حاضرگچه دوام ایتماقده و بو دور تینچلیک سوزلشوولر قچان یکونلنیشی حاضرگهقدر بیللی بولمهگن.
شو توغریده…
طالبان: تینچلیک کیلیشووی نهایی بولیش عرهفهسیده
