اوشبو امنیتی کوچلر وردوج تومنیده اوتکزیلگن عملیات جریانیده هلاک ایتیلگن. بدخشانده آتی فاش ایتیلیشی‌نی ایستمه‌گن امنیتی کوچلرنینگ قومندانلریدن بیری اوشبو خبرنی تصدیقلب سلام‌وطندارگه ایتیشیچه، اوتگن کون امنیتی کوچلر وردوج تومنی ده عملیات اوتکزیش اوچون باره‌یاتگن چاغیده، وردوج و زیباک تومن‌لری آره‌سیده‌گی «رباط» منطقه‌سیده طالبان گروهی نینگ پیستیرمه‌سیگه دوچ کیلیشگن.
منبع گه کوره، اوشبو واقعه نتیجه‌سیده امنیتی کوچلردن 13 ته‌سی هلاک، 10 ته‌سی جراحت‌لنیب و باشقه 15 ته‌سی اسیر آلینگن.
منبع نینگ کوپه‌یتیریشیچه، مردمی و چیگره‌یی 4- کندک کوچلری شامل 50 کیشی‌لیک امنیتی بیر گروه درک‌سیز یوقالگن و اولرنینگ تقدیریدن حاضرگه‌قدر هیچ بیر خبر یوق دیر.
بیراق، بدخشان حاکمی سوزلاوچیسی نیک‌محمد نظری، امنیتی کوچلرنینگ قربانلیگی‌نی 5 کیشی دییدی. اونینگ کوپه‌یتیریشیچه، مذکور ولایت نینگ وردوج، کران‌ومنجان و جرم تومن‌لریده اوتگن کوندن بویان باشلنگن عملیات نتیجه‌سیده، طالبان گروهی آغیر قربانلیک بیرگن.
جناب نظری گه کوره، بو عملیات ده طالبان جنگریلریدن 30 ته‌سی هلاک و باشقه 20 ته‌سی یره‌لنگن و تازه‌لش حربی عملیات مذکور تومن‌لر طالباندن تازه‌لنگونگه‌قدر دوام ایتیشی ممکن.
طالبان گروهی حاضرگچه جنگریلری نینگ قربانلیگی توغریسیده میدیالرگه هیچ نرسه دیمه‌گن.
عین حالده، بدخشان یشاوچیلری و مدنی فعاللری نینگ ایتیشیچه، امنیتی کوچلرنینگ مدیریتسیزلیگی و آره‌لریده بولگن اویغونسیزلیک باعث، حربی کوچلرنینگ قربانلری کوپه‌یگن.
بدخشان محلی حکومتی مرکزی حکومت حمایتی بیلن ایکی کوندن بویان طالبان نینگ نظارتی ده بولگن تومنلرنی قیتریب آلیش اوچون قوشمه حربی عملیات باشله‌گن. بدخشان محلی رسمی‌لری نینگ ایتیشیچه، یولگه قوییلگن عملیات‌لر جریانیده حاضرگه‌قدر وردوج و جرم تومن‌لری نینگ ایریم بولیمی طالبان نینگ نظارتی دن چیقاریلگن.
عین دمده، بدخشان محلی رسمی‌لری، بو عملیات طالبان نینگ نظارتی ده بولگن منطقه‌لر بوتونله‌ی طالباندن تازه‌لنگونگه‌قدر دوام ایتیشی نی بیلدیرگن، بیراق بدخشان یشاوچیلری، بو عملیات‌لرنی وقتینچه‌لیک و نتیجه‌سیز دییدیلر.
شو توغریده…
بدخشانده مالی حمایه کیسیلگنی باعث، جاری ییل کوکنار ایکینی بوزیلمه‌گن
