اوتگن کون «جمعه» سویسده اوتکزیلگن داووس اقتصادی ییغینینینگ چیکهسیده سی.ان.ان تلویزیونی بیلن صحبت اوتکزگن جمهور رئیس محمداشرف غنینینگ ایتیشیچه، 2014- ییلدن بویان عصیانچیلرگه قرشی اوروشده 45 مینگدن آرتیق عسکر هلاک ایتیلگن.
جمهور رئیسنینگ بو سوزلری جدی عکسالعمللرگه روپهره بولدی.
سلاموطندارگه صحبت بیرگن حربی ایش بیلرمانلردن بیرقطارینینگ ایشانچی گه کوره، امنیتی ادارهلرده بولگن مدیریتسیزلیک، فساد و حربی جهاز کملیگی 2014- ییلدن بویان 45 مینگدن آرتیق عسکر هلاک ایتیلیشی گه سبب بولگن.
حربی ایش بیلرمان محمد رادمنش نینگ ایتیشیچه، عصیانچیلرگه قرشی کورهش نامیده بونچه حربی عسکر اولمهسی کیرهک.
رادمنش گه کوره، اوروش میدانلریده مدیریتسیزلیک و حربی جهاز کملیگی مملکت حربی کوچلرینینگ قربانلیگی کوپهییشی گه سبب بولگن.
اونینگ ایتیشیچه، امنیتی کوچلرنینگ اختیاریده بولگن حربی جهازگه قرهگنده، بو کوچلر عصیانچیلرگه قرشی توریب و اوزلریدن مدافعه قیله آلمهیدیلر.
اوشبو حربی ایش بیلرمان گه کوره، ناتو تشکیلاتی گه اعضا مملکتلر اینیقسه آمریکا، افغان امنیتی کوچلری گه عصری حربی جهاز بیرمهگن صورتده، مملکت قول اردولری فایدهلنمهیدیگن حربی جهازلرنی امنیتی کوچلرگه تاپشیریش کیرهک.
رادمنش نینگ ایتیشیچه، هر 4 ییلده 45 مینگ امنیتی عسکر هلاک ایتیلگنده، ینه دن مملکت یشاوچیلری امنیتی کوچلرنینگ صفیده قوشیلیش گه حاضر بولمهیدیلر.
حربی ایش بیلرمانلردن باشقه بیری کابلخان تدبیرنینگ ایتیشیچه، امنیتی کوچلرنینگ تشکیلاتیده بولگن مدیریتسیزلیک، فساد و کیشیلر علاقه و واسطه اساسیده تعیین ایتیلیشی باعث، امنیتی کوچلرنینگ قربانلیگی آشگن.
اونینگ ایتیشیچه، حربی کوچلردن 45 مینگ تهسینینگ هلاک ایتیلیشی یوقاری رقم سنلهدی و بو آرهده 45 مینگ عصیانچی و شونینگدیک، 45 مینگ تینچ اهالی هلاک ایتیلگن و بو رقم اساسیده، چمهسی 150 مینگ کیشی هلاک ایتیلگن.
4 ییل جریانیده 45 مینگ امنیتی عسکر هلاک ایتیلگنی اجتماعی ترماقلر اینیقسه فیسبوک ده جدی عکسالعمللرگه روپهره بولدی.
فیسبوک ایشلاوچیلری بو رقمنی جوده هم خواطرلی بیلیب ایتیشلریچه، بو موضوع یالغیز بیر رقم ایمس، بلکیم کته فاجعه دیر.
شونینگدیک، سویسده داووس اقتصادی ییغینی چیکهسیده جمهور رئیس غنینینگ ایتیشیچه، اوتگن تورت ییلده امنیتی کوچلردن کمیده 100 مینگ تهسی وظیفهلرینی ترک قیلگنلر.
