پاکستان‌نینگ اونملی کونده‌لیک‌لریدن بیری اکسپرس تربیون، ینگی‌لیک‌ده آمریکالیک بیر مقام‌دن نقل قیلیب گزارش بیریشیچه، آمریکا، افغانستانده‌گی حربی قرارگاه‌لرینی سقلش خصوصیده، طالبلر بیلن مذاکره اوتکزماقده و بو موضوع توغریسیده طالبان گروهی‌نینگ قانیقتیریش اوچون سعی و حرکت قیله‌دی.
اوشبو گزارش گه کوره، طالبلرنینگ افغانستان توپراغیدن غرب و حمایت قیلووچی مملکت‌لرنی تهدید قیلمه‌یشی‌نی تضمین قیلیش و افغانستانده امریکانینگ حربی قرارگاه‌لری سقله‌نیشی امریکانینگ ایکی اساسی ایستک‌لریدن دیر.
اکسپرس تربیون گزارشی‌گه کوره، طالبان گروهی هردایم چیت‌ایللیک کوچ‌لرنی افغانستان‌دن چیقیشی اوستیگه تاکید قیلگن؛ بیراق کورنیشیچه، بو گروه عرب قوشمه اماراتی‌گه اوتکزیلگن ییغینده امریکانینگ بو ایکی پیشنهادگه رضایت کورستگن.
عین‌حالده، تینچلیک عالی کینگشی سوزلاوچیسی‌نینگ اروین باسری اسدالله زایری‌نینگ امریکا پیشنهادینی تصدیق‌لب سلام‌وطندارگه ایتیشیچه، اوشبو کینگش افغانستان یشاوچیلری منفعتی‌گه بولگن هرقندی حرکت‌دن حمایت قیله‌دی.
اونینگ ایتیشیچه، طالبان گروهی بیلن اوتکزیلگن تینچلیک مذاکره‌لریده افغانستان یشاوچیلری‌نی ایسته‌گی و حکومت‌نینگ 17 ییل‌لیک یوتوقی مطرح ایتیلگن.
شونینگ‌دیک، سیاسی ایش بیلرمانلردن فدامحمد نظری و ایچکی ایشلر وزیرلیگی‌نینگ سابق اورین باسری میرزامحمد یارمندنینگ ایتیشیچه، تینچلیک تامین ایتیلگندن سونگ، طالبلر هم امریکا یاردمی‌گه نیازی تاپه‌دی و انه‌شو سبب بو ایستک‌لرنی قبول قیلیش احتمالی بار.
اولرگه کوره، امریکانینگ افغانستانده‌گی دایمی قرارگاهی مملکت منفعتی‌گه دیر و منطقه مملکت‌لرنینگ دخالتی‌گه توسیق بوله‌دی.
عین‌حالده، اکسپرس تربیون کونده‌لیگی‌نینگ امریکالیک بیر مقام‌دن نقل قیلیب ایتیشیچه، افغانستانده تینچلیک تامین ایتیلگن دن سونگ امریکا خلق ارا جماعه‌سی و عرب مملکت‌لری هماهنگ‌لیگی بیلن اوشبو مملکتده قیته‌قوریش خصوصیده همکارلیک‌لرینی کوپه‌یتیره‌دی.
