بوگون «دوشنبه» کابل‌ده خبری بیر ییغین اوتکزگن افغانستان ایرکین میدیالریدن حمایت قیلووچی اداره یا «نی» تشکیلاتی اجراییه باشلیغی عبدالمجیب خلوتگرنینگ ایتیشیچه، اولر مملکت‌ده میدیا ایشلاوچیلری و خبرچیلرگه قرشی تورلی زوره‌وانلیک‌لر جمله‌دن قتل، جراحت، اوغیرلاوچیلیک و باشقه ایریم زوره‌وانلیک‌لر شامل 190 زوره‌وانلیک قضیه‌نی اوروش جنایت‌لری صفتیده خلق ارا جنایی محکمه‌سیده رویخط‌گه بیرگن.
جناب خلوتگرگه کوره، مذکور قضیه‌لر قویاش 1382- ییل‌دن باشلب بوگونگچه رویخط‌ده آلینگن و اصلی عامل‌لری طالبان، داعش و حقانی ترماغی سنله‌دی.
شونینگ‌دیک، «نی» تشکیلاتی اجراییه باشلیغی، حکومت و بیرلشگن ملت‌لر تشکیلاتیدن خلق ارا جنایی محکمه‌سیده خبرچیلرگه قرشی زوره‌وانلیک قضیه‌لرنی رویخط‌گه بیریب و تیکشیریشی اوچون یاردم بیریشلرینی طلب قیلگن.
جناب خلوتگرنینگ کوپه‌یتیریشیچه، خلق ارا جنایی محکمه‌سیده رویخط‌ده آلینگن خبرچیلرگه قرشی یوز بیرگن قضیه‌لرگه 48 قتل، 74 جراحت، 15 اوغیرلاوچیلیک و 53 تهدید شامل بوله‌دی.
افغانستان ایرکین میدیالریدن حمایت قیلووچی اداره مسؤول‌لری، افغانستانده میدیا قوریلمه‌لری، ایشلاوچیلری و خبرچیلرگه قرشی عصیانچی گروه‌لر تامانیدن اویوشتیریله‌دیگن زوره‌وانلیک و هجوملرنی اوروش جنایتی دیب بیله‌دیلر.
خلق ارا جنایی محکمه یا-ده آی سی سی، دنیا بوییچه اوروش جنایتی، انسانیت‌گه قرشی جنایت‌لر و نسل کُشلیک جنایت‌لرینی تیکشیره‌دیگن بیرینچی خلق ارا دایمی محکمه سنله‌دی و خلق ارا جماعه‌چیلیگی نظریدن ینگی جنایت‌لرنی تیکشیره‌دی.
