د باجوړ، مومندو، خېبر، اورکزۍ، کورمې، شمالي وزیرستان او جنوبې وزیرستان اجنسیو د قبایلو شورا نن په کابل کې د غونډې په ترڅ کې له خېبر پښتونخوا سره د قبایلي سیمو یو ځای کېدلو په اړه د پاکستان د پارلمان پرېکړه وغندله.
د پاکستا ن پارلمان په وروستیو کې د پاکستان حکومت هغه طرح تایید کړې چې لهمخې یې په یو اړخیزه توګه قبایلي سیمې له خېبر پښتونخوا سره تړل کېږي.
د افغانستان او هند بریتانوي حکومت د هوکړې لهمخې هېڅ لوری د قبایلي سیمو په اړه د یوې اړخیزې پرېکړې حق نهلري او هر لوری چې پهدې سیمو کې کوم ګام اخلي؛ اړ دی چې له بل لوري سره پرې سلا مشوره وکړي.
د قبایلو شورا استازیو پهدې غونډې کې د پاکستاني چارواکیو وروستۍ پرېکړه ناقانونه وبلله او د یو پریکړهلیک په خپرولو سره یې د افغان حکومت او قومونو او قبایلو چارو وزارت وروستۍ خبرپاڼې ملاتړ وکړ.
د غونډې لس مادهییز پرېکړهلیک د قبایلو شورا رییس زرجان شینواري ولوست چې په یوې برخې کې یې له نړۍوالې ټولنې او ملګرو ملتو، اسلامي کنفرانس، مدني تولنو په تېره بیا د پاکستان له مدني ټولنو غوښتل شوي چې پاکستان له خپلې پرېکړې راوګرځوي.
د غونډې ګډونوالو وویل، پاکستان دې د قبایلو ازادي نه تر پښو لاندې کوي، ځکه چې دوی ځانونه د تاریخي افغانستان یوه برخه بولي.
په همدې حال کې د سرحدونو، قومونو او قبایلو چارو وزارت ویاند جاویداحمد وفا سلام وطندار ته وویل چې دوی د پاکستان دا پرېکړه یو اړخیزه بولي او د افغان حکومت له لوري د پاکستان دا کار غندل شویدی.
دی وایي یاد وزارت ولسمشر ته وړاندیز کړی چې پهدې اړه د اړوند ادارو ګډې کمېټې په جوړولو همغږي ګامونه واخېستل شي.
د کتونکیو په اند، پاکستانيو چارواکیو په وروستیو کلونو کې د قبایلي سیمو لاندې کولو په موخه لومړی دغلته بهرني اورپکي ځای پرځای کړي او په لوی لاس یې د ناامنیو اور بل کړی او وروسته یې د هغوی پر خلاف د پوځي عملیاتو په پلمه خپل ځواکونه پهکې ځای پر ځای کړيدي.
دوی وایي، اوس پاکستاني چارواکي هڅه کوي چې د قبایلي سیمو دودیزه خپلواکي له منځه یوسي او دا سیمې له خېبر پښتونخوا سوبې سره وتړي چې د ځایي خلکو او افغان چارواکیو له کلک غبرګون سره مخ شويدي.
