د شمال د نفت او ګازو د تخنیکي خدمتونو امریت سلګونو کارکوونکيو د دغه امریت له کارکوونکيو د ۴۰۴ بستونو کمېدو په اعتراض لاریون وکړ او د دې ولايت د مقام دروازه يې وتړله.
دوی خبرداری ورکړ چې که د کانونو او پټرولیم وزارت د دغې ادارې د ۴۰۴ کمو شویو بستونو د برخلیک په اړه پرېکړه ونه کړي، ټول تاسیسات او کانونه به خوشې کړي او هغه وروسته به د هر ډول پېښې مسوولیت د حکومت پر غاړه وي.
يادو کسان ادعا کوي چې حکومت د بستونو کمولو او له دوی د دندو له اخيستو سربېره، د هغوی استوګنیز کورونه چې په دولت پورې یې اړه لرله، غضنفر شرکت ته سپارلي دي.
د جوزجان د والي مرستیال عبدالقادر مالیه، د شمال د نفت او ګازو د تخنیکي خدمتونو د سروې امریت د کارکوونکيو له کمېدو په اندېښنې سره وايي چې که د دوی برخلیک روښانه نه شي، د دې ولایت د کانونو ساتنه به ستونزمن کار وي.
تر دې مخکې د ملي يووالي حکومت اجراييه رييس عبدالله عبدالله جوزجان ولایت ته په خپل سفر کې ویلي وو چې د دې امریت د کارکوونکيو ستونزې له ولسمشر سره شریکوي؛ څو معقول او منطقي حل لاره ورته پیدا کړي. خو د څو میاشتو په تېرېدو د دې امریت د کارکوونکيو ستونزې لا هم نه دي حل شوي.
