د عامې روغتیا وزارت اعلان کړی چې په کابل کې به یو روغتون او یو د تشخیص مرکز د ناقانوني اقداماتو له کبله وتړل شي. دغه وزارت ویلي، روغتونونه او د تشخیص مرکزونه د کورونا ویروس د تشخیص واک او وړتیا نه لري.
د عامې روغتیا وزارت ویاند وحید مایار نن د یوې خبري غونډې پر مهال وویل، هغه روغتونونه چې د کورونا ویروس د تشخیص ادعا یې کړې، په نښه شوي او ډېر ژر به وتړل شی.
د نوموړي په وینا، یوه روغتون ورته ویلي چې د کورونا ویروس تشخیصوي او د هر مورد په بدل کې درې زره افغانۍ اخلي. هغه زیاته کړه، د عامې روغتیا وزارت د کورونا ویروس ټولې معاینې په وړیا توګه کوي.
مایار وايي، یوازې د دغه وزارت له لوري جوړ شوي مرکزونه د کورونا ویروس د تشخیص واک لري او په وینا یې، هغو روغتونونو ته یې پلاوی لېږلی چې د کورونا د تشخیص ادعا یې کړې وه.
په هېواد کې د کورونا ویروس له خپرېدو راهیسې د ۳۴۰ شکمنو پېښو له ډلې ۲۲ یې مثبتې اعلان شوې دي. هرات چې له ایران سره ګډه پوله لري، پر دې ناروغۍ ډېر اخته کسان لري.
د عامې روغتیا وزارت ویاند وویل، په تېرو څلېرویشت ساعتونو کې د کورونا ویروس هېڅ پېښه نه ده ثبت شوې.
