د افغانستان د سولې انسټېټیوټ مسوولانو نن په کابل کې د یوې خبري ناستې پر مهال وویل، په هېواد او سیمه کې د سولې راتلو لپاره سیاسي اراده او اجماع نشته او د حکومت مشران هم له سولې نه واک ته د رسېدو لپاره د یوې وسیلې په توګه کار اخلي.
د افغانستان د سولې انسټېټیوټ مرستیال بشیر هاتف وايي، د سولې روانې پروسې په اړه ټاکلی دریځ نشته او دغه کار لامل شوی چې خلک د سولې پر پروسې او روانو هڅو بېباوره او هم د سولې د نا پیل شویو بینالافغاني خبرو لړۍ هم بېګټې وګڼي.
هاتف زیاتوي، ۶۰ سلنه خلک د سولې لپاره روانې هڅې یوه استخباراتي لوبه بولي.
په ورته وخت کې د مصالحې عالي شورا ویاند فریدون خوځون وايي، د باور جوړونې لپاره د خلکو همکاري او یوې پایلې ته د سولې پروسې رسېدل جدي اړتیا ګڼل کېږي او ترڅنګ یې حکومت او طالبان هم باید د خلکو اندېښنو ته د پای ټکی کېږدي.
د افغانستان د سولې انسټېټیوټ مسوولان دغه راز وايي، د جګړې او منفي تبلیغاتو له ادبیاتو نه ګټه اخيستل لامل شوي چې د حکومت او طالبانو ترمنځ اختلافونه زیات شي چې په وینا یې، دغه دوه اړخونه باید پر یو بل له تور پورې کولو لاس واخلي.
