افغان ولسمشر محمد اشرف غني وايي، چې حکومت يې د بیان پر ازادۍ مطلق باور لري، خو رسنۍ هم باید ملي ګټو ته ترجيح ورکړي.
هغه چې نن پنجشنبه (اکټوبر ۱) ماښام د کندوز د سقوط په اړه خبري کنفرانس درلود زیاته کړه، هيڅوک نه شي کولی، چې د افغانستان له اوسني کړکېچن وضعیت څخه ګټه واخلي.
هغه زیاته کړه، چې په کندز کې ټولې لارې د امنیتي کمیسیون تر کنټرول لانډې دي او" هغوی ته مې لارښوونه کړې، چې غیر مسوولو افرادو ته ښار ته د ننوتلو اجازه ورنه کړي."
غني له ټولو هېوادوالو د وطن د دفاع په خاطر له چمتو والي د مننې ترڅنګ دا هم وویل، چې د وسلې استعمال يواځې د نظام په چوکاټ کې ممکن دي.
هغه هدایت ورکړ، چې ټولې قواوې د هغو کسانو پر وړاندې چې "زموږ سر، مال، عزت او امنیت ته ګواښ پېښوي په یوه لیکه کې ودرېږي."
محمد اشرف غني زیاته کړه، چې دښمن نه شي کولی د خلکو قوي او راسخ عزم ته زیان ورسوي او ټول افغان امنيتي ځواکونه د دې وړتيا لري، چې د مخالفو وسله والو هرډول تهاجمي بريدونو ته ځواب ورکړي.
هغه دا هم وویل، چې افغان امنيتي ځواکونه تر اوسه هيڅ تلفات نه لري.
غني وویل، چې د قانون د حاکمیت او د باور فضا د رامنځته کولو له پاره لازمه ده، چې ټول د ملي اردو او ملي پولیسو په لیکو کې تنظیم شي اوځوانان باید د امنيتي او دفاعي ځواکونو په لیکو کې ځانونه تنظیم کړي.
د افغانستان ولسمشر زیاته کړه، چې افغانان د یو ماهر او مکار دښمن سره مخامخ دی او باید د تروریزم تمیلونکي هېواد ته لاسونه یو او انزوا لور ته يې کوښښ وشي.
ولسمشر غني زیاته کړه، چې د قانون د حاکمیت او د باور فضا د رامنځته کولو لپاره لازمه ده، چې ټول د ملي اردو او ملي پولیسو په لیکو کې تنظیم شي. ځوانان هڅوم چې د امنیتي او دفاعي ځواکونو په لیکو کې ځانونه تنظیم کړي.
همدارنګه د یو بل خبر له مخې غني ویلي، چې د څېړنو په رڼا کې به هغوی چې په خپلو دندو او مسوولیتونو کې یې غفلت کړی مجازات شي او د امنیتي او دفاعي ځواکونو هغه افسران او منسوبین به تقدیر کړي، چې د کندز ښار په بېرته نیولو کې یې مېړانه کړې.
