افغانستان بوییچه بیرلشگن ملت‌لر تشکیلاتی نیگن اورین باسرلیک هیأتی یا-ده یوناما دفتری نینگ اعلان قیلیشیچه، میلادی 2020- ییل نینگ بیرینچی اوچ آیی جریانیده افغانستان اوروشی نتیجه‌سیده 150 باله شامل 500 دن آرتیق تینچ اهالی هلاک ایتیلگن.
بوگون «دوشنبه، 8- ثور» یوناما تامانیدن «انسانلرنی قوتقریش اوچون تیزلیک بیلن حرکت قیلیش کیره‌ک» نامیده ترقه‌تگن ینگی گزارشی ده ایتیشیچه، اوشبو دفتری جاری میلادی ییل نینگ بیرینچی اوچ آیی جریانیده توپلم شکلده تینچ اهالی نینگ قربانلیگی توغریسیده 1293 واقعه رویخط گه آلگن و بو جمله‌دن 533 تینچ اهالی هلاک و باشقه 760 ته‌سی یره‌لنگن. اوشبو گزارش‌ده کیلیشیچه، مارچ آیی ده زوروانلیک خواطرلی شکلده کوپه‌یگن. البته شو آی ده «افغانستان حکومتی و طالبان آره‌سیده تینچلیک سوزلشوولری باشلنگن ایدی.»
افغانستان بوییچه بیرلشگن ملت‌لر تشکیلاتی نینگ باش کاتبی‌نی خاص نماینده‌سی و یوناما باشلیغی دیبرا لاینزنینگ ایتیشیچه: «مین بوتون اوروش تامانلریدن کووید- 19 آتلی قوشمه بیر دوشمن گه قرشی کوره‌ش خصوصیده، توپلم سعی و حرکت‌لرگه دقت قیلیش اوچون دنیا بویلب آتیش‌کیسین برقرار ایتیلیشی توغریسیده، بیرلشگن ملت‌لر تشکیلاتی نینگ باش کاتبی‌نی ایسته‌گی بیلن وجودگه کیلگن فرصت‌دن فایده‌لنیش‌لرینی طلب قیلگن.»
لاینزنینگ کوپه‌یتیریشیچه: «افغانستانده سناقسیز تینچ اهالی نینگ جانی سقله‌نیشی و یخشی کیله‌جک اوچون اهالی گه امید بیریلیشی خصوصیده، آتیش‌کیسین ایجاد ایتیلیب و تینچلیک سوزلشوولری باشله‌نیشی اوچون زوروانلیک‌لر توخته‌تیلیشی اونملی دیر.» شونینگدیک، اونینگ ایتیشیچه، یوناما خاص شکلده مارچ آیی جریانیده زوروانلیک‌لر شدتلنگنی و تینچ اهالی نینگ قربانلیگی کوپه‌یگنی توغریسیده خواطرده دیر.
کابل بوییچه بیرلشگن ملت‌لر تشکیلاتی نینگ سیاسی دفتری گه کوره، تینچ اهالی قربانلریدن کوپینچه‌سی 22- فبروری دن 28- فبروری گچه دولت گه طرفدار کوچلر و طالبان آره‌سیده زوروانلیک‌لر کمه‌ییش دوره‌سی و شونینگدیک، 29- فبروری ده آمریکا قوشمه ایالت‌لری و طالبان آره‌سیده تینچلیک کیلیشوونامه‌سی امضالنگن بیرچاغده، بولگن.»
یونامانینگ گزارشی ده کیلیشیچه، جاری میلادی ییل نینگ بیرینچی اوچ آیی جریانیده دولت گه قرشی قوراللی عصیانچیلرنینگ هجوملری باعث، 282 تینچ اهالی هلاک و باشقه 428 تینچ اهالی یره‌لنگن و بو رقم ایسه تینچ اهالی قربانلریدن 55% تشکیل بیره‌دی. یوناما تینچ اهالی قربانلریدن 39% طالبان گه، 13% داعش گروهی نینگ خراسان بولیمی و قالگنینی دولت گه قرشی نامعلوم تشکیلات‌لرگه نسبت بیره‌دی.
افغانستان بوییچه بیرلشگن ملت‌لر تشکیلات دفتری نینگ ایتیشیچه، دولت گه قرشی قوراللی عصیانچیلر اینیقسه طالبان گه نسبت بیریلگن تینچ اهالی قربانلری نینگ رقمی میلادی 2019- ییل نینگ بیرینچی اوچ آیی گه نسبتن سِرلی قتل‌لر و صحرایی محکمه‌لر آشگنی باعث، 22% کوپه‌یگن. میلادی 2020- ییل نینگ بیرینچی اوچ آیی جریانیده تینچ اهالی قربانلریدن 32% نینگ مسؤولی دولت گه طرفدار کوچلر تانیلگن و بونگه 412 واقعه شامل بوله‌دی و بو جمله‌دن 198 کیشی هلاک و باشقه 214 کیشی یره‌لنگن.
یونامانینگ ایتیشیچه، میلادی 2020- ییل نینگ بیرینچی اوچ آیی جریانیده، دولت گه قرشی قوراللی عصیانچی‌لرگه نسبتن دولت گه طرفدار کوچلر کوپلب باله‌لرنینگ اولیمی گه مسؤولی بولگن و بو کوچلرگه عاید قربانلیک اوتمیش گه نسبتن ایکی برابر آشگن. یوناما گه کوره، بو قربانلردن کوپینچه‌سی گه هوایی هجوملر و ییر آتیشمه‌لری جریانی ده غیرمستقیم اوق آتیش‌لر سبب بولگن.
افغانستان بوییچه بیرلشگن ملت‌لر تشکیلاتی نینگ گزارشی اساسیده، تینچ اهالی قربانلری نینگ سونگی واقعه‌لری جاری میلادی ییل نینگ بیرینچی اوچ آیی ده خلق ارا حربی‌لریگه نسبت بیریلگن و بو واقعه‌لر زوروانلیک کمه‌ییش دوره‌سیدن آلدین 17- فبروری ده یوز بیرگن.
یونامانینگ ایتیشیچه، زوروانلیک‌لردن کوپلب عیاللر و باله‌لر زیان کوریشگن؛ میلادی 2020- ییل، 1- جنوری دن 31- مارچ گچه اوشبو اداره باله‌لرنینگ قربانلیگی توغریسیده 417 واقعه رویخط گه آلگن و بو جمله‌دن 152 باله هلاک و باشقه 265 باله یره‌لنگن. شونینگدیک، عیاللرنینگ قربانلیگی توغریسیده 168 واقعه رویخط گه آلگن و بو جمله‌دن 60 عیال هلاک و باشقه 108 عیال یره‌لنگن.
افغانستان بوییچه بیرلشگن ملت‌لر تشکیلاتی نینگ دفتری، اوشبو گزارش‌ده برچه اوروش تامانلریدن کرونا ویروسی کینگ شکلده رواجلنگنی اوچون تینچ اهالی نینگ جانی سقله‌نیشی توغریسیده تیزلیک‌که آتیش‌کیسین اعلان قیلیش‌لرینی طلب قیلگن.
