قطرده طالبان گروهی نینگ سیاسی دفتری سوزلاوچیسی سهیل شاهین نینگ ایتیشیچه، افغانستان تینچلیک لایحهسی بوییچه آمریکانی خاص نمایندهسی زلمی خلیلزاد و افغانستانده چیتایللیک کوچلرنینگ قومندانی جنرال اسکات میلر طالبان رهبری نینگ سیاسی اورین باسری ملاعبدالغنی برادر بیلن اوچرهشگن.
شاهین نینگ اوز توییتر صحیفهسیده یازیشیچه، بو اوچرهشوو اوتگن کون «یکشنبه، 18- جوزا» اوتکزیلگن و ایکی تامان محبوسلر تیزلیککه قوییب یوباریلیشی، افغانلر ارا سوزلشوولر باشلهنیشی و باشقه موضوعلرنی توغریسیده صحبت قیلیشگن.
شونینگدیک، اوشبو اوچرهشووده قطر تشقی ایشلر وزیرلیگی نینگ خاص نمایندهسی مطلق القحطانی و اونگه همراه بولگن هیأت هم اشتراک قیلگن.
زلمی خلیلزاد دوحه دن کیین پاکستان گه باریب و مذکور مملکت نینگ حربی کوچلرینی باش قومندانی جنرال قمر جاوید باجوه بیلن اوچرهشگن.
پاکستان میدیالری تامانیدن بیریلگن گزارش اساسیده، بو اوچرهشووده تینچلیک جریانی، پاکستاندهگی افغانستانلیک مهاجرلرنینگ مسئلهسی و پاکستان-افغانستان چیگرهسی نینگ مدیریتی توغریسیده صحبت قیلینگن.
افغانستان تینچلیک لایحهسی بوییچه آمریکانی خاص نمایندهسی زلمی خلیلزاد، جمعه کون، 16- جوزا، دوحه، اسلامآباد و کابل گه ینگی دور سفرلرینی باشلهدی.
آمریکانینگ تشقی ایشلر وزیرلیگی، زلمی خلیلزادنینگ بو دور سفرلریدن مقصد، افغانلر ارا سوزلشوولر باشلهنیشی اوچون تینچلیک جریانیده کیرهک بولگن کیینگی قدملر توغریسیده افغانستاندهگی طرفلر آرهسیده کیلیشووگه قول تاپیش دیگن.
