بلخ ولایتی نینگ تومن‌لریدن بیرقطاری نی یشاوچیلری نینگ ایتیش‌لریچه، اوشبو ولایتده 8 مینگ عایله نینگ برقینی پولی طالبان تامانیدن توپلنه‌دی. مذکور ولایت یشاوچیلریدن بیرقطاری نینگ سلام‌وطندارگه ایتیش‌لریچه، ایکی ییل دن بویان هم دولت و هم طالبان اولردن برق پولی آله‌دیلر.
بلخ یشاوچیلریدن بیری نینگ ایتیشیچه، هم دولت و هم طالبان بیزلردن برق پولی طلب قیلیشه‌دی. بیزلر بیلمه‌یمیز پوللریمیز قییرگه کیته‌دی و بو دولت بیلن ملت نینگ ایگه‌سی کیم دیر.
بلخ ولایتیده برشنا شرکتی نینگ مسؤوللری، اوشبو ولایت یشاوچیلری نینگ ادعالرینی تصدیقلب ایتیشیچه، 10 آیدن بویان اولر 3 تومنده بولگن 10 مینگ عایله دن برق پولینی توپله آلمه‌گن.
بلخ ولایتیده برشنا شرکتی باشلیغی حمیدالله حمیدنینگ سلام‌وطندارگه ایتیشیچه، بو ریاست طالبان آرقه‌لی توپلنه‌دیگن برق پولی قنچه بولگنینی بیلمه‌یدی، بیراق طالبان آرقه‌لی عایله‌لردن پول آلینیشی‌نی تصدیقلیدی.
اونگه کوره، شونچه مدتده اولر بلخ، چمتال تومن‌لری و افغانیه و ترکمنیه قیشلاقلریده متر اوقیه آلمه‌گن‌لر.
بلخ حاکمی سوزلاوچیسی منیر فرهادنینگ ایتیشیچه، حاضرگه‌قدر برشنا شرکتی بو موضوع توغریسیده رسمی شکایت قیلمه‌گن.
طالبان گروهی هم حاضرگه‌قدر آدملری تامانیدن برق پولی توپله‌نیشی توغریسیده هیچ نرسه دیمه‌گن.
بلخ ولایت کینگشی باشلیغی افضل حدید، برشنا شرکتی نینگ مسؤوللری و مرکزی حکومت نی برق بهاسی توغریسیده انصافسیزلیک‌که عیب‌لب ایتیشیچه، باشقه ولایت‌لرگه نسبتن بو ولایتده برق بهاسی یوقاریلیگی بلخ یشاوچیلری نینگ اساسی قیین‌چیلیک‌لریدن بیری بولگن.
بلخ ده بیر کیلووات برق بهاسی 6.25 افغانی بولگن، حال بوکه کابل و هرات ولایت‌لریده بیر کیلووات برق بهاسی 2.25 و 4 افغانی حسابلنه‌دی.
