۴۰۰ طالبان محبوسی قوییب یوباریلیشی خصوصیده تینچلیک مصلحتی لویه جرگه بوگون (جمعه ۱۷- اسد) جمهوررییس غنی نینگ بیاناتی بیلن آچیلدی.
جمهوررییس محمداشرف غنی نینگ ایتیشیچه، طالبان محبوس‌لری قوییب یوباریلگن صورتده مذکور گروه کیله‌جک اوچ کون گچه افغانستان‌لیکلرارا سوزلشوولر باشله‌نیشی حقیده سوزبیرگن.
جناب غنی نینگ کوپه‌یتیریشیچه، شونینگدیک طالبان محبوس‌لری قوییب یوباریلمه‌گن صورتده، بو گروه زوروانلیکلرنی کوپه‌یتیریش‌لری خصوصیده آگاه‌لنتیرگن.
جناب غنی گه کوره، طالبلرنینگ ۴۶۰۰ محبوسی دوحه تینچلیک کیلیشوونامه‌سی اساسیده قوییب یوباریلدی، بیراق اساسی قانون اساسیده، قالگن ۴۰۰ محبوس نی قوییب یوباریش گه اونینگ صلاحیتی یوق.
جمهوررییس تینچلیک‌که ایریشیش اوچون آمریکا نینگ سعی و حرکتی‌دن قدردانلیک قیلیب ایتیشیچه، آمریکا حربی کوچلری نی افغانستاندن چیقاریش توغریسیده هر قنده‌ی قرار آلگنده اونینگ قراری گه حرمت بیره‌دی.
ملی مصالحه عالی کینگش باشلیغی و ایکینچی تینچلیک مصلحتی لویه جرگه باشلیغی عبدالله عبدالله نینگ ایتیشیچه، تینچلیک مصلحتی لویه جرگه اعضالری ایکی گزینه اوروش دوام ایتیشی و تینچلیک تامین ایتیلیشی اوستیگه قرار آلیش‌لری ممکن.
اونینگ ایتیشیچه، بو جرگه نینگ قراری‌دن کیین ملی مصالحه عالی کینگشی نینگ رهبرلیک ایشی نی هم باشله‌شی ممکن.
ایکینچی تینچلیک مصلحتی لویه جرگه ده ۷۰۰ عیال شامل ۳۲۰۰ کیشی ۳۴ ولایتدن اشتراک قیلگن.
طالبان تینچلیک مصلحتی لویه جرگه یولگه قوییلیشی خصوصیده عکس‌العمل بیلدیرگن.
مذکور گروه بیر خبرنامه ترقه‌تیب ایتیشیچه: «بونده‌ی بیر کیچیک موضوع خصوصیده لویه جرگه نی تشکیل بیریش‌دن مقصد ۴۰۰ محبوس نی قوییب یوباریش ایمس، بلکیم ناقانونی قدرت نی دوام بیریش، اوروش نی کینگه‌یتیریش و تینچلیک نی آلدینی آلیب و افغانستان‌لیکلرارا سوزلشوولرنی تخریب قیلیش دیر.»
اوشبو گروه نینگ کوپه‌یتیریشیچه، «۴۰۰ محبوس نی قوییب یوباریش مهم ایمس، بلکیم اولرنینگ اصلی مقصدی آلدین‌دن تیارلنگن غنی و هم تیمی‌لری نینگ اعلاناتی دیر.»
تینچلیک مصلحتی لویه جرگه یولگه قوییلگن بیرحالده، خلق‌ارا کیچیریم تشکیلاتی نینگ اعلام قیلیشیچه، افغانستان تینچلیک پروسه‌سیده قربانیلرگه توجه قیلیش کیره‌ک. بو نهاد نینگ ایتیشیچه، افغانلر باشقه هرکیم گه قره‌گنده تینچلیک که محتاج دیر، بیراق تینچلیک نینگ خره‌جتی انسانیت گه قرشی جرم‌لرنینگ کم ستیش معناسیگه کیلمه‌یشی کیره‌ک.
باشقه بیر تاماندن افغانستان انسان حقلری کمیسیونی باشلیغی شهرزاد اکبر نینگ ایتیشیچه، محبوس‌لرنی قوییب یوباریش خصوصیده دولت و دنیا جماعه‌چیلیگی نینگ توجه‌سیزلیگی خواطرلی دیر و بو تینچلیک پروسه‌سیده قربانی محور عدالت نی خواطرلی تقدیر بیلن روپه‌رو قیلیشی ممکن.
خانم اکبر بوگون توییتر صحیفه‌سیده یازیب ایتیشیچه، گزینه‌لر یالغیز محبوس‌لرنی قویباریش یا-ده قویبارمه‌سلیک ایمس دیر. اونگه کوره: «شونینگدیک شرط‌لی آزادلیک‌لرهم رواج دیر. باشقه بیر تاماندن شرط‌سیز و قیدسیز قوییب یوباریش وازکیچیش فرهنگی گه سبب بوله‌دی و بو قربانیلر حقلری و حق‌العبدی موضوع‌لرگه آچیق توجه‌سیزلیک دیر.»
خانم اکبر مذکور جرگه اشتراکچی‌لریدن، بحث و سوزلشوولریده بو موضوعلر اینیقسه قربانیلر حقلری گه توجه قیلیش‌لرینی سوره‌گن.
