جمهورلیک ریاستی سوزلاوچیسی صدیق صدیقی نینگ ایتیشیچه، دولت طالبان محبوسلریدن بیر قطاری نی قوییب یوبارگن و اولرنینگ باشقهلرینی تبادله قیلیش خصوصیده ایشلرنینگ دوامی بار.
بوگون (چهارشنبه ۱۲- سنبله) جمهورلیک ریاستی سوزلاوچیسی بیر توییت یازیب ایتیشیچه، تبادله قیلیش ایکی تامانلمه دیر و حکومت بو پروسه نینگ هر باسقیچی نی تیکشیریب نظارت قیلهدی.
اونینگ کوپهیتیریشیچه، افغانستان دولتی تینچلیک پروسهسی حقیدهگی وعدهلریگه عمل قیلگن. اونگه کوره، تینچلیک پروسهسیدهگی دولت نینگ وعدهلری لویه جرگه نینگ قراری اساسیده صورت تاپهدی.
جناب صدیقی گه کوره، بیزلر (افغانستان دولتی) طالبان هم امنیتی کوچلر محبوسلرینی قوییب یوباریلیشی توغریسیده بیرگن وعدهلرینی عمل قیلیشلرینی کوتیب تورگن میز.
افغانستان دولتی حاضرگچه طالبان گروهی نینگ ۲۰۰ خوفلی محبوسلرینی مملکت قماقخانهلریدن قوییب یوبارگن.
شونینگدیک اوتگن کون طالبان هم کوماندو کوچلریدن ۶ تهسینی قوییب یوباردی.
ایکی تامان محبوسلری بوتونلی قوییب یوباریلگنیدن کیین، افغانستان دولتی نینگ مذاکره قیلووچی هیأتی طالبان نمایندهلری بیلن سوزلش اوچون دوحه کیتیشی گه قرار قیلینگن.
عین حالده، بوگون ایرتهلب مصالحه عالی کینگش سوزلاوچیسی فریدون خوزون نینگ ایتیشیچه، محبوسلرنینگ تبادله قیلیش پروسهسی باشلنگن و بو پروسه یکونلهنیشی افغانستانلیکلرارا سوزلشوولرگه زمینه یرهتیشی ممکن.
