حکومتنینگ اجراییه باشلیغی، جمهور رییس غنی و اجراییه رییسی اورتهسیده پیدا بولگن جنجللرگه پایان بیریش اوچون سعی حرکتلر بارلیگیدن خبر بیرگن.
اجراییه ریاستینینگ مدنیت و اخبارات مسالهلر بوییچه مصلحتچیسی سیدفاضل سانچارکینینگ سلاموطندارگه ایتیشیچه، جمهور رییس بیلن اجراییه باشلیغی هنوزهم یوز مه یوز اوچرهشمهگن بولسه لر هم لیکن ایکی تامان نمایندهلری اورتهسیده مذاکره دوامی بار.
جناب سانچارکی، جمهور رییسنینگ ملی امنیت ایشلری بوییچه مصلحتچیسی محمدحنیف اتمر اوتگن کون (شنبه) جناب عبدالله بیلن اوچرهشیب جمهور رییس غنی بیلن عبدالله اورتهسیده پیدا بولگن قیینچیلیک توغریسیده صحبت قیلگن دیگن. ملاقاتده مسالهنینگ حل یولی اوستیده بحث ایتیلگن.
شونینگدیک جناب سانچارکی حکومتنینگ رهبرلری ترورچیلیککه قرشی کورهش، امنیت تامین ایتیلیشی و ملی کوچلر تقویت ایتیلیش مسالهسیده بیر فکرده لر دیگن.
شو کبی اجراییه ریاستینینگ مدنیت و اخبارات ایشلری بوییچه مصلحتچیسی بو معماگه پایان بیریلمهگن حالده، کیلهجکده سلبی تاثیر قالدیریلیشی ممکن لیگی بارهسیده آگاهلنتیرگن.
اوتگن هفته پنجشبنه کونی حکومتنینگ اجراییه باشلیغی عبداللهعبدالله یاشلر خلق ارا کونینی نشانلش مناسبتی بیلن اوتکزیلگن ییغینده جمهور رییس غنینی کوتیلمهگن روشده تنقید ایتگن ایدی.
عبدالله، ملی بیرلیک حکومتی رهبرلری اورتهسیده قول قوییلگن شرطنامه جمهور رییس تامانیدن عملی ایتیلمهگن لیگینی اظهار ایتگن ایدی. شونینگدیک عبدالله، جمهور رییس غنی اوچ آیده هم اجراییه ریاستی رییسی بیلن اوچرهشیب ملاقات قیلیشده وقت تاپمهگن لیکدن نالیگن ایدی.
جناب عبدالله نینگ بو قبیل گپلریدن سونگ، یاشلر خلق ارا کونی مناسبتی بیلن اویوشتیریلگن ییغینده نطق سوزلهگن جمهور رییس غنی عبدالله نینگ تنقیدلریگه اشاره قیلیب ایتیشیچه، اوزیگه ایشانمهگن کیشلریگه هیچ بیر زمان اعتماد قیلمسلیگینی اظهار ایتدی.
