بیرلشگن ملت‌لر تشکیلاتی بوییچه افغانستان نینگ دایمی نماینده‌سی عادله راز، خلق ارا جماعه‌سیدن تینچلیک سوزلشوولرده اوشبو مملکت یوتوق‌لریدن حمایت بیلدیریشی‌نی ایسته‌گن.
خانم راز، اوشبو صحبت‌لرنی اوتگن "پنجشنبه" کونی بیرلشگن ملت‌لر تشکیلاتی نینگ خوفسیزلیک کینگشی ییغینیده بیان قیلگن. بیرلشگن ملت‌لر تشکیلاتی بوییچه افغانستان نینگ دایمی نماینده‌سی نینگ ایتیشیچه: « بیز تینچلیک سوزلشوولر اوچون حرکت قیله‌میز، حاضرده خلق ارا جماعه‌سی نینگ جدی حمایتی‌گه نیازیمیز بار.»
خانم راز نینگ کوپه‌یتیریشیچه: «افغانستان‌لیکلر ارا سوزلشوولرده سونگی ایکی دهه ده‌گی یوتوق‌لر اینقسه عیال‌لر حقوق‌لریدن حفاظت قیلیش افغانستان و خلق ارا جماعه‌سی اوچون کته سیناو دیر.»
عین‌حالده، افغانستان بوییچه بیرلشگن ملت‌لر تشکیلاتی نینگ خاص نماینده‌سی دیبرا لاینز نینگ مذکور ییغینده ایتیشیچه، 4 دهه اوروش دن سونگ، افغانستان یشاوچی‌لری اوروش و ناتینچلیک یکونله‌نیشی‌گه امیدوار بولگن‌لر.
ایتیلیشیچه، اوتگن "پنجشنبه" کونی افغانستان حکومتی طالبان محبوس‌لری نینگ قوییب یوباریلیش جریانی یکونله‌نیشیدن خبر بیریب و افغانستان‌لیکلر ارا سوزلشوولرنینگ بیرینچی دوری قطر باشکنتی دوحه شهریده یولگه قویلیشی‌نی بیلدیرگن ایدی. شونینگدیک، افغانستان حکومتی تامانیدن تعیین‌لنگن مذاکره قیلیووچی هیاتنی اوتگن کونی قطرگه باریشی خصوصیده قرار قیلینگن ایدی، بیر اوشبو سفر آرتده قالدیریلگن.
