ننگرهار محلی رسمی‌لری‌نینگ ایتیشیچه، اوتگن کون کیچ قورون مذکور ولایت‌نینگ هسکه‌مینه تومنی ده‌بالا قیشلاغی‌ده بیر فاتحه مراسم اوستیگه تشقی کوچلر تامانیدن هجوم اویوشتیریلگن. بو هجوم‌ده 2 عیال شامل 8 تینچ اهالی هلاک ایتیلگن و شونینگ‌دیک، داعش گروهی‌نینگ 3 قومندانی شامل 25 اعضاسی هلاک و باشقه 15 اعضاسی یره‌لنگن.
بیراق، ناتو کوچلری بو واقعه‌ده تینچ اهالی هلاک بولگنینی رد قیلگن. کیسکین حمایه‌وی کوچلر سوزلاوچیسی دامین هوروات نینگ ایتیشیچه، تینچ اهالی تلفاتی توغریسیده هیچ بیر گزارش قولگه کیریتمه‌گن‌لر.
عین حالده، هسکه‌مینه ولسوالی سازولی شینواری‌نینگ سلام‌وطندارگه ایتیشیچه، اوشبو هجوم فاتحه مراسم گه اشتراک ایتگن داعش گروهی‌گه تیگیشلی آدملر امنیتی کوچلرگه تامان اوق آتگن بیرچاغده یوز بیرگن.
اوشبو مراسم اشتراکچی‌لریدن بیرقطاری‌نینگ سلام‌وطندارگه ایتیشیچه، بو هجوم کوتیلمه‌گن حالده یوز بیرگن و کمیده 35 تینچ اهالی جان بیرگن.
بیراق، ننگرهار حاکمی سوزلاوچیسی عطاالله خوگیانی، تینچ اهالی تلفاتی‌نی 8 کیشی دیب ایتیشیچه، بو جمله‌دن 5 ته‌سی عیال و باشقه 3 ته‌سی کیچیک باله دیر.
شونینگ‌دیک، اوشبو ولایت ساغلیق‌نی سقلش ریاستی باشلیغی داکتر نجیب‌الله کامه‌وال‌نینگ ایتیشیچه، یوز بیرگن واقعه‌دن 8 یره‌دار هسکه‌مینه کسلخانه‌سیگه انتقال بیریلگن و اولردن 6 ته‌سی عیال دیر.
داعش گروهی حاضرگچه بو واقعه توغریسیده هیچ نرسه دیمه‌گن.
