بغلان بیلیم یورتی نینگ محصللری همده استادلری ولایت نینگ خوفسیزلیک وضعیتی توغریسیده خواطر بیلدیریب، خبرنگارلیک، مهندسلیک، اقتصاد و ادبیات فاکولته‌لرینی حسین خیل منطقه‌سیدن کوچیریب شهرنینگ امنیت ییرگه آلیب باریلیشی اوستیده تاکید قیلگنلر.
اولر، ملی کوچلر درسلیک صنفلرنی حربی قرارگاه صفتیده فایده‌لنه‌دی دیگنلر. محصللر، نیچه کون آلدین قوراللی طالبلر بیلن ملی کوچلر اورته‌سید‌ه یوز بیرگن توقشنوده بیلیم یورت صفنلری‌نینگ بوتون شیشه‌لری توکیلیب توشدی دیدیلر.
سلام‌وطندارگه صحبت بیرگن محصللردن بیری عزیزه مبارز، هوا ایسیب باریشی بیلن بو منطقه ده اوروش هم شددتلشگن لیگینی ایته‌دی. اوروش پیتیده صنفلری حربی قرارگاه صفتیده فایده له‌نیلیشینی ایته‌دی بو محصل. اونینگ سوزلریگه کوره، محصللر بو وضعیت بیلن درس‌گه دوام بیریشی ممکن ایمس.
باشقه بیر محصل فروزان یعقوبی، بیلیم یورتده تانکلر همده باشقه حربی جهازلر موجودلیگی فاکولته‌لر فضاسینی اوروش چیزیغی‌گه ایلنتیر دیگن.
بغلان بیلیم یورتی نینگ استادی سمیع الله وفا، اوتگن نیچه ییل جریانیده‌گی نابرقرارلیکلر سبب عیاللرنینک کته قسمی تحصیل‌دن قالگن لیگینی تیلگه آلگن. او، مرکزی حکومت‌دن حسین خیل منطقه‌سیده جایلشگن فاکولته‌لرنی شهر مرکزیگه آلیب کیلیشنی سوره‌گن.
بغلان بیلیم یورتی نینگ رییسی خلیل احمد کانجو، بیلیم یورت امنیتی قیین چیلیگی بر طرف ایتیلیشی اوچون قوم بویوکلری همده امنیتی رسمیلر بیلن صحبت قیلگن لیگینی بیلدیرگن. حسین‌خیل منطقه‌سی نینگ امنیتی تامین بولگن‌دن سونگ، یاتاقخانه هم فایده‌له‌نیش گه تاپشیریله‌دی دیگن جناب رییس.
بغلان عمومی یوللریده مشکل موجودلیگینی اعتراف قیلگن ولایت امنیه قوماندانی اکرام‌الدین سریع، حسین‌خیل اره‌لیغیده جایلشگن عمومی قتناو یول امنیتی تامین ایتیلیشی اوچون سعی و حرکت قیله‌میز دیگن.
بغلان بیلیم یورتی نینگ 55 مینگ محصلی بار. بولرنینگ کته قسمینی قیز طلبه‌لر تشکیل ایته‌دی.
