حکومت و گلبدین حکمتیار رهبرلیگیده اسلامی حزب اورتهسیده پنجشنبه کونی تینچلیک شرطنامهسی جمهور رییس ملی امنیت مصلحتچیسی محمدحنیف اتمر، تینچلیک یوکسک کینگشی باشلیغی سیداحمد گیلانی، تینچلیک یوکسک کینگشی اورین باسری عطاالرحمان و اسلامی حزب تامانیدن سوزلهشیش هیأت باشلیغی محمدکریم امینلر ارا کابلده امضا بولدی.
تینچلیک یوکسک کینگشی باشلیغی مذکور شرطنامه گه قول قویلیشی مملکت بویلب تینچلیک اورنهتیش باشلهنیشی و عصیانچی گروهلردن اسلامی حزبنی اوزلریگه الگو بیلیب اوروشدن قول کوتاریب تینچلیکنی قبول قیلیشلرینی ایستهدی.
اسلامی حزب سوزلهشیش هیآت باشلیغی محمدامین کریم نینگ ایتیشیچه، اوشندهیکه باشلهنیشده مذاکره کوپلب قیینچیلیکلر بیلن روپهره بولدی، اما حاضر بو شرطنامه فقط اسلامی حزب و حکومت ارا امضا بولمهگن بل افغانستانده دایمی تینچلیک اورنهتیش باشلهنیشی بولیشی ممکن.
شونینگدیک جناب کریم اسلامی حزب افغانستاندن سونگی تشقی کوچلر بیرینچی نفری قالگونگه قدر کورهشی دوام ایتهدی دیب تأکید قیلهدی.
تینچلیککه ایریشیش قربانلیک آلهدی و اسلامی حزب بو لایحهنی قبول قیلیشی بیلن قربانلیک بیرگن دیدی جمهور رییس نینگ ملی امنیت مصلحتچیسی محمدحنیف اتمر.
.jpg)
جناب اتمرگه کوره، بیرلشگن ملتلر ملی امنیت کینگشی دایمی اعضالریدن 5 تهسی افغانستان حکومتیگه تینچلیک شرطنامهسیگه قول قوییلیشی بیلن اسلامی حزب بلندمرتبهلی رسمیلریگه قوییلگن برچه تعذیراتلرنی کوتاریش وعدهسینی بیرگن. او، حاضر بو برچه تعذیراتلر کوتاریش پیتی ییتیب کیلگنلیگینی اوروغلیدی.
جمهور رییس نینگ ملی امنیت مصلحتچیسی، اوشبو شرطنامه اساسیده حکومت اسلامی حزب رهبری گلبدین حکمتیار و باشقه بلند مرتبهلی اعضالرینی مملکتده کیلیشلریگه زمینه یره تهدی و اونگه بدیل اسلامی حزبی هم تیزلیکده آتش بس اعلام قیلیب حربی تحرکاتلرینی توختهتهدی دیب کوپهیتیردی.
جناب اتمرگه کوره، باشقه عصیانچی گروهلر هم اوروشدن قول کوتاریب تینچلیک لایحهسینی قبول قیلگنده، اسلامی حزبیگه بیریلگن امتیازلرنی قولگه کیلتیره آلهدیلر.
حکومت و اسلامی حزب اورتهسیده امضا قیلینگن شرطنامه 3 فصل و 25 ماده ده ترتیب بیریلگن و مذکور شرطنامهگه جمهور رییس غنی و گلبدین حکمتیارلرهم قول قوییشلری ایتیلهدی.
کابلدهگی امیریکه ایلچیسی، یوناما دفتری و اروپا اتحادیهسی اعلامیه ترقهتیب افغانستان حکومتی و حکمتیار اسلامی حزبی اورتهسیده قول قوییلگن شرطنامه اوچون اوز آرقهداشلیکلرینی بیلدیرگن.
