فراه شهری قوراللی طالبلر تصروفیگه اوتیشی بارهسیده تشویش بیلدیرگن فراه ولایتی نینگ ولایت کینگشی اعضالری و مدنی فعاللری، بیر هفتهدن بیری دوام ایتهدیگن اوروش اوز پایانیگه ییتمگهگن بلکه قوراللی طالبلر شهر ایشیگیگه کیلگنلر دیگنلر.
فراه ولایتی نینگ ولایت کینگشی اعضالری، حاضر شهر اطرافیدهگی تورت قیشلاق قوراللی طالبلر تامانیدن اشغال ایتیلگن دیدیلر. جنگریلرنینگ کیشیلری شهرنینگ اوچ کیلو مترلیگیگه اوزینی ییتکزگن.
فراه ولایت کینگشی نینگ باشلیغی فریداحمد بختور، طالبلر شهرگه یقین لشگن فراه مرکزی طالبلر قولیگه اوتیشی امکاندن اوزاق ایمس دیدی.
فراه ولایت کینگشی نینگ ینه بیر اعضاسی خیرمحمد نوروزی، افغان ملی کوچلری هنوزگچه جنگری طالبلرنی آرتگه اوروشگه موفق بولمهگن لیکلرینی تیلگه آلگن.
شونینگدیک شهرنینگ بیر قنچه اهالیسی هم ولایت مرکزی عصیانچی طالبلر کنترولیگه اوتیشیدن تشویش بیلدیرگنلر. اهالی، حکومتدن فراه شهری قندوز تقدیریگه اوچرهمسلیگی بارهسیده تاکید قیلگنلر.
بیراق، فراه امنیه قوماندانی توریالی عبدیانی، شهرده اوروش ملی کوچلر فایدهسیگه دیب، حربی تازهلش عملیات هنوز هم شهر اطرافیدهگی قیشلاقلرده دامی بار دیدی.
جناب عبدیانی، حربی عملیاتلر جریانیده دولت قوراللی مخالفلری نینگ 40 تهسی اولدیریلگنی و 20 تهسی یرهلنتیریلگن لیگینی بیلدیرگن.
اونینگ سوزلریگه کوره، جنگری طالبلر هلمند، هرات و نیمروز ولایتلری نینگ تومنلریدن فراه اوستیگه هجوم قیلگنلر. عین حالده، ولایت امنیه قوماندانی دولت قوراللی مخالفلری هجومی آلدینی آلیش اوچون ولایتده ییترلی درجهده حربی قوشین بارلیگی حقیده ایشانچ بیرگن.
