فاریاب ولایتینینگ محلی مسؤوللری، مذکور ولایتنینگ پشتونکوت تومنیده تیلان ناملی استراتیژیکی منطقه سقوط قیلگنی و ایکی محلی قومندان طالبلرگه قوشیلگنیدن خبر بیرگنلر.
فاریاب ولایتی کینگشی باشلیغی محمدطاهر رحمانینینگ ایتیشیچه، کمیده 1500 طالب ایکی کوندن بویان تیلان منطقهسیده محلی کوچلر اوستیگه هجوم اویوشتیرگن و محلی کوچلرنینگ ایکی قومندانی طالبلرگه قوشیلگنی باعث، مذکور حربی منطقه سقوط قیلگن.
فاریاب ولایتی کینگشی باشلیغینینگ آگاهلنتیریشیچه، حکومت رسمیلری، تیلان منطقهسینی قیتهدن نظارتگه آلیش اوچون تیزلیکده چاره تدبیر کورمهگن تقدیرده، اونینگ اطرافیدهگی قیشلاقلرهم طالبلرنینگ قولیگه سقوط قیلهدی و شونینگدیک، فاریاب ولایتینینگ مرکزی میمنه شهری هم اوشبو گروهنینگ تهدیدیگه روپهره بولیشی ممکن.
پشتونکوت تومنینینگ امنیه قومندانی حیاتالله سرخابی، تیلان منطقهسی طالبلر تامانیدن تصرف ایتیلگنینی تصدیقلب ایتیشیچه، اوشبو منطقه اوستیگه یوزلرچه طالب هجوم اویوشتیرگنیدن کیین، امنیتی کوچلر آرقهگه چیکیلیشگه مجبور بولگنلر؛ بیراق تیلان منطقهسینی قیتهدن نظارتگه آلیش عملیات باشلنگن.
اونگه کوره، مذکور منطقهده امنیتی کوچلر بیلن طالبلرنینگ اورتهسیده یوزبیرگن توقنهشوولر نتیجهسیده، حاضرگچه 4 طالب هلاک ایتیلگن و باشقه 7 تهسی یرهلنگن.
عین حالده، فاریاب امنیه قومندانلیگیده آتی فاش ایتیلیشینی ایستمهگن بیر منبعنینگ سلاموطندارگه ایتیشیچه، قوراللی طالبلر، مذکور ایکی محلی قومنداننینگ عایله اعضالرینی گروگه آلیب و اولرنی آگاهلنتیرگن کیم، تسلیم بولمهگن صورتده، عایله اعضالرینینگ باشلرینی کیسهدی.
اوشبو منبعگه کوره، مذکور ایکی محلی قومنداننینگ کمیده 60 قوراللی نفری بار ایکن و یاردم اوچون تکرار ایستکلریگه جواب بیریلمهگنی باعث، اوروشدن قول تارتیب طالبلرگه قوشیلگن.
