اوتگن کون افغانستان شمال شرقیده جایلشگن قندوز ولایتی توستدن هجوم آستیگه آلنیب شهر مرکزی جنگریلر تصرفیگه اوتیشی حکومت و خوفسیزلیک اداره لریگه قرهتیلگن ایریم سواللرنی توغدیرگن.
اوتگن کون ایرتلب قوراللی طالبلر قندوز شهریگه اوچ تاماندن هجوم قیلیب شامگه قدر ولایت مرکزینی بوتونلی قولگه کیریتیش گه موفق بولدی.
افغانستانلیک حربی تحلیلچی جاوید کوهستانینینگ سلام وطندارگه ایتیشیچه، قندوز سقوط قیلمهگن بلکه دشمن گه ساتیلگن. کوهستانی نینگ سوزلریگه قرهگنده جنگریلر اهالی همکارلیگی بیلن ولایت مرکزینی تصرف قیلیشگه موفق بولمه گن، لیکن اوشبو ایش تیزیم ایچیده بولگن شخصلر طالبلرگه همکارلیک قیلیب شهرنی سقوط بیرگنلر.
جناب کوهستانیگه کوره، قوراللی طالب تامانیدن بیردنگه قندوز شهری تصرف ایتیلیشی ممکن ایمس ایدی، بلکه جنگریلر بوندن نیچه کوندن بیری ایریم خوفسیزلیک بیلباغلر و شهرنینگ تورلی جایلریده ییرلشگنلر.
حربی تحلیلچی جناب کوهستانی اوشبو ولایت طالبلر اشغالیگه اوتگن لیگی اوچون اسختبارات همده ملی کوچلرنی عیب دار بیلهدی.
اما، قندوز ولایت امنیه قوماندانینینگ سوزلاووچیسی سید سرور حسنی ولایت مرکزی جنگریلر تصرفیگه اوتگنی اوچون ملی کوچلر عیب دار ایمس بلکه جنگریلر توستدن هجوم قیلیب اوشبو شهرنی اوز ادارهلریگه آلیشگه موفق بولگنلر دیگن.
قندوز شهرینی سقوط قیلیشی سنامجلس اعضالرینینگ جدی عکس العملیگه روپه ره بولدی. افغانستانلیک سناتورلرگه کوره، قندوز طالبلرگه تاپشیریلگن.
سناتورلردن نادر بلوچگه کوره، کجلی نمایندهلر بوندن آلدین نیچه مرته قندوز ولایتی نینگ ایریم حدودلریگه جنگریلر ییرلشگنلیگینی ایتیب، مذکور ولایت عصیانچیلر تصرفیگه اوتیشی بارهسیده خواطر بیلدیرگن ایدیلر.
سناتولردن باشقه بیری حسیبالله کلیمزی سنا مجلسینینگ رییسیدن مجلس نینگ کیلگوسی عمومی ییغینیده ولایت والیسی همده امنیه قوماندانی مذکور مجلس گه چقیریشنی سورهگن.
افغانستان سنا مجلسی نینگ رییسی فضل هادی مسلیم یار قندوز حادثهسی دردلی واقعه دیب، ولایت والیسی همده امنیه قوماندانی و ملی ارو قوماندانی قندوزنی مدافعه قیله آلمهگنلری اوچون حربی محکمه گه تاپشیریلشی نی طلب قیلگن.
بوگون توشدن آلدین بیر خبری ییغینده سوز یوریتگن افغانستان ملی مدافعه وزیرلیگی نینگ سرپرستی معصوم استانکزی مذکور واقعه معامله یاده پروپاگند بولگنلیگی توغریسیده جدی تیکشیروو اوتکزیلیشی نی ایتگن. شونینگ دیک استانکزی قوراللی طالبلر تینچ اهالی لباسیده هییت کونلری شهرگه کیرگنلیکلرینی بیلدیرگن.
مملکت ملی اردوسینینگ اورین باسری مرادعلی مراد اوتگن کون (دوشنبه) افغانستان ملی کوچلری تینچ اهالیگه تلفات ییتمسلیگی اوچون شهردن آرتگه چیکینگنلیکلرینی ایگن. ایتیلیشیچه، جنگریلر عادی اهالی اوییگه کریب آلگنلر.
عین حالده، افغانستان جمهور رییسی محمد اشرفغنی بوگون توشدن سونگ قیلگن نطق سوزیده قندوز شهری تیزلیکده ملی کوچلر ادارهسیگه اوتیشی بارهسیده ایشانچ بیردی.
