کمیده 15 کون آلدین، جاری ییل 26- حملده، تخار ولایت کینگشی اعضاسی و اسلامی جمعیت حزبیگه باغلیق کیشیلردن بیری عینالدین رستاقی، جنبش حزبیگه باغلیق کیشی و نمایندهلر کینگشینینگ سابق اعضاسی ملاپیرمقل ضیایینینگ قیین آتهسی عینالدین باغحصاری تامانیدن، ایکی همراهسی بیلن اولدیریلدی. دیمک سلاموطندار بو گزارشده عینالدین رستاقینینگ اولیمی خصوصیده بولگن قضیهنی آچیقلهشی یانیده، مذکور تومنده یوزبیرهدیگن باشقه شوندهی واقعهلرنی آچیقلهگن.
رستاقینینگ اولدیریلیش حکایهسی نیمه ایدی؟
جمهور رییس تامانیدن، «26/1/1395» تاریخده صادر بولیب نشر ایتیلگن فرمانده کیلیشیچه: «تخار ولایتیدن کیلگن دستلبکی معلوماتلر اساسیده، رستاق شهریده جایلشگن ایکی سوداگرلیک بلاک قوریلیشی خصوصیده، تخار ولایت کینگشی اعضاسی وکیل عینالدین رستاقینینگ طرفدارلری بیلن حاجی عینالدیننینگ اوغلینی اورتهسیده یوزبیرگن قوراللی توقنهشوو نتیجهسیده، ایکی تاماندن نیچه کیشی هلاک بولیب و یرهلنگن».
بیراق، عینالدین رستاقینینگ قوروقچیسی محمدیونس، مذکور قضیهنی بوندهی دیب حکایت قیلهدی، ملاپیرمقل ضیایینینگ قیین آغهسی و عینالدین باغحصارینینگ اوغلی همایون توقنهشوو نتیجهسیده هلاک بولگنیدن کیین، ملاپیرمقل رستاق امنیه قومندانی، شهردار و اوشبو تومن ولسوالیدن تیزلیکده رستاق امنیه قومندانلیگینینگ بوشهتیشینی سورهگن، دیمک تیزلیکده نفرلری، او ییرده عملیات یولگه قوییشی ممکن.
رستاقینینگ قوروقچیسیگه کوره، محلی رسمیلر امنیه قومندانلیگینی ترک ایتهدی و عملیات باشلنهدی؛ بیراق اوشبو عملیات عینالدین رستاقی بیلن ایکی قوروقچیسینینگ هلاکتی نتیجهسیده یکونلنهدی.
عین حالده، ملاپیرمقلنینگ سلاموطندارگه ایتیشیچه، عینالدین رستاقینینگ قولی عینالدین باغحصارینینگ اوغلی همایوننینگ قانیگه باتگنیدن کیین، همایوننینگ قرینداشلری تامانیدن اولدیریلگن. اوشبو قومندان اوزینی آقلب ایتیشیچه، رستاقی بیلن هیچ قندهی خصومتی بولمهگن و او بیلن اوروشیش اوچون هیچ بیر دلیل هم موجود ایمس ایکن.
عینالدین رستاقینینگ اولیم قضیهسی سبب، رستاق تومنینینگ امنیت مدیری، شهرداری و امنیه قومندانی تخار ولایت مقاملری تامانیدن وظیفهلریدن چیتلنتیریلیب و باش قارهلاوچیلیککه تانیشتیریلگنلر.
شونینگدیک، جمهورلیک ریاستی اوشبو قضیهنی تیزلیکده معلوم قیلیش اوچون، رستاقگه بیر هیأت یوبارگن. اوشبو هیأت تشکیلی مملکت باش قارهلاوچیلیک ادارهسی حربی قارهلاوچیلیک جنایی جرملرنی تیکشیرووچی ریاستی باشلیغی تورن جنرال محمدقایم، ایچکی ایشلر وزیرلیگی استخبارات ریاستی اورین باسری ملپاسوال محمدعمر، مدافعه وزیرلیگی کشفی ریاستی استخبارات و کشفی مدیری بریدجنرال صلاحالدین، اداری ایشلر عمومی ریاستی دفاع و امنیتی ریاست اعضاسی دگروال عبدالله احمدزی و محلی ارگانلر ایرکین ادارهسی تیکشیرووچی باشلیغی عبدالله جبارخیلدن عبارت.
ایچکی ایشلر وزیرلیگی استخبارات ریاستی اورین باسری ملپاسوال محمدعمرنینگ سلاموطندارگه ایتیشیچه، اولر تیکشیروولرینی اوز اداغیگه ییتکیزگن و تیزلیکده گزاشلرینی جمهور رییسگه ارایه ایتهدی. محمدعمرگه کوره، گزارش معلوماتی جمهور رییسگه ارایه ایتیلگنی کیین، خلق و میدیا بیلن شریک قیلینهدی.
بیزلرگه قرشی توختهگنلرگه قورال بیلن جواب بیرهمیز
سلاموطندار تامانیدن قولگه کیریتیلگن باشقه بیر حجتگه کیلیشیچه، 1394- ییل اسد آییده، رستاق تومنی گذر قیشلاق یشاوچیلریدن بیری، ملاپیرمقلنینگ نفرلریدن بیری اسلامالدین تامانیدن کلتکلنیب و اولیمگه تهدید بولگنی اوچون، مذکور تومن امنیه قومندانلیگیگه شکایت قیلگن.
اوشبو شکایت سبب، امنیه قومندانلیگی اسلامالدیننینگ اویینی تیکشیریش اوچون گذر قیشلاققه بیر هیأت یوبارگن. دستلبکی محکمه حکمی و اوشبو هیأت تیکشیرووی نتیجهسیده، عیبلنگن کیشینینگ اوییدن بیش شاجور اوق بیلن «62411» شمارهلی بیر میل قورال، بیر کمربند و بیر بیچاق تاپیب آلینگن. بیراق «156» شمارهلی تیکشیرووچی هیأت مینگن حربی موتر امنیه قومندانلیگیگه قیتهیاتگن چاغیده رستاق تومنی سردشت منطقهسیده هجومگه دوچ کیلهدی و اوندن کیین، عینالدین باغحصاری و همایون شامل کمیده 20 دن 30 قوراللی کیشی تیکشیرووچی هیأت اوستیگه هجوم قیلهدی، نتیجهده مذکور تومننی دستلبکی محکمه تیرگاو قارهلاوچیسی محمدمیر هلاک بولیب و باشقه بیرقطار کیشی یرهلنهدی.
تخار محلی حکومتی اوشبو قضیهنی تیکشیریش اوچون، ولایت مقامی نمایندهلری، امنیه قومندانلیگی، ملی امنیت ریاستی، دستلبکی قارهلاوچیلیک، ولایتی کینگش و رستاق تومنی رسمیلریدن عبارت باشقه بیر هیأتنی منطقهگه یوبارهدی. مذکور هیأت قیضهنی تیکشیرگنیدن کیین، بوندهی بیر موضوعگه اشاره قیلگن.
- ملاپیرمقل، بیرینچی هیأت موتریگه اویوشتیریلگن هجومگه عیبدار عینالدین، همایون و باشقه همراهلری توتقونگه آلینیشینی باشقرگن.
- رستاق تومنی دستلبکی تیکشیروو قارهلاوچیسی، ملاپیرمقلنینگ حمایتی بیلن قتل ایتیلگن و بو قومندان اسلامالدیننینگ اوییدن مذکور هیأت قولگه کیریتگن قورال و حربی جهازلرنی دولتگه تاپشیرمهگن.
- حاضرگچه ملاپیرمقل تامانیدن بویروغیدهگی کیشیلرگه 500 دن 1000 قورال ترقهتیلگن و قانونی حجتی بولمهگن قورال و حربی جهازلر حکومتگه تاپشیریلمهگن.
رستاق وضعیتینی باشقریش اوچون امنیتی کوچلر یوباریلیشی، رستاق امنیه قومندانی رحمتالله احمدینینگ وظیفهسیگه قیته تیکلنیشی، حکومت تامانیدن ملاپیرمقلنینگ فعالیتلری خصوصیده دقت قیلینمهگنی و تخار استخبارات مدیری بیلن امنیه قومندانی تهدیدلری، اوشبو تیکشیروونی باشقه معلوماتلریدن بولگن. اوشبو هیأتنی آگاهلنتیریشیچه، ملاپیرمقلنینگ فعالیتلری باشقریلمهگن صورتده، رستاق امنیتی یمان بولیشی ممکن.
ملاپیرمقل بیلن تیکشیرووچی هیأت اورتهسیده اوتکزیلگن سوزلشوولرینی بیر قسمی سلاموطندارگه ییتیشگن و بو سوزلشوولرده ایریم حقیقتلر آچیقلنهدی. بو سوزلشووده پیرمقل، بیرینچی تیکشیرووچی هیأت اوستیگه اویوشتیریلگن هجومدن حمایت قیلهدی و اسلامالدیننینگ اویینی تیکشیریش اوچون بارگن هیأت توغریسیده بوندهی دییدی: «قارهلاوچینی اولدیریب یخشی قیلیبدی، نیمه اوچون مردمنینگ اوییگه بارهدی و بولردن کتهراغی هم کیلسه آغزیگه اورهمن».
بو سوزلشووده اونینگ آگاهلنتیریشیچه، کیمسه اونگه قرشی تورسه، قورال بیلن جواب بیرهدی. پیرمقل، تیکشیرووچی هیأتدن، قطار امنیتی رسمیلرنی انتقال بیریب و جایلریگه «خیرخواه» کیشیلر جایلشتیریلیشینی سورهگن. اوشبو بیرینچی تیکشیرووچی هیأت اوستیگه اویوشتیریلگن هجوم قضیهسیده، هیأتنی عیبلب ایتیشیچه، محلی حکومت رسمیلری، هر بیر ایشگه اوندن رخصت آلیشی کیرهک، رخصت آلمهگن تقدیرده، نتیجهسیگه اوزلری مسؤول بولهدی.
شونینگدیک، اوشبو قومنداننینگ سلاموطندارگه ایتیشیچه، قارهلاوچی ناقانونی شکلده اسلامالدیننینگ اوییگه کیرگن.
ملاپیرمقل ضیایی کیم؟
ملاپیرمقل ضیایی، مملکت شمالیده طالبلرگه قرشی مقاومت کوچلرینینگ محلی قومندانلریدن بولیب و ینگی تیزیم تشکیل ایتیلگنی کیین، نمایندهلر کینگشیگه یول تاپدی. بیراق ایکینچی دورده نامزدلیکدن وازکیچیب، ولایتگه قیتدی.
مملکت شمالی ولایتلری جملهدن تخار، بدخشان و قندوزده سونگی ناتینچلیکلر کینگهیگنی باعث، طالبلرنی نابود ایتیش اوچون، سابق جهادی قومندانلر حمایه بولیب و جهازلنیشیگه قرار قیلیندی. سلاموطندار تامانیدن قولگه کیریتیلگن معلومات اساسیده، پیرمقل ضیایی جهازلنگن قومندانلردن بیری بولگن.
اوشبو قومندان بیرینچیدن، خلق کوچلری نامیده حکومتدن 500 قورالگه رخصت آلگن. بو قضیه دستلب خلق ایچیده ایریم قرشیلیکلرگه سبب بولدی. دیمک 1394- ییل 30- سرطانده، اوشبو قضیه خصوصیده، رستاق یشاوچیلریدن اونلرچهسی ناراضیلیککه قول اورگنلر.
شخصی قماقخانهلر
تخار ولایتینینگ امنیه قومندانلیگی تامانیدن عمومی استخبارات ریاستی و ایچکی ایشلر وزیرلیگی وضعیتلرنی تیکشیریش ادارهسیگه، 23/7/1394 تاریخیده یوباریلگن «5166/1599 تا 5169/1602» شمارهلی مکتوبگه کیلیشیچه، پیرمقل بویروغیدهگی عینالدین، پهلوان ابراهیم، قومندان اعظم و قومندان زماننینگ تیزیم شکلده گذر، قرهعاچ، چنار و گوگری قیشلاقلریده شخصی قماقخانهلری بار دییلگن.
اوشبو مکتوبده کیلیشیچه: مذکور قومندانلر کونده محل خلقینی اوستیگه زورهوانلیک قیلهدی و منطقه اهالیسینی اوز باشیمچهلیک قیلیب قماققه تشلهیدیلر».
بیراق، پیرمقل ضیایینینگ ایتیشیچه، هیچ قندهی شخصی قماقخانهسی یوق و بو حجتنی قطار دولتچیلر تامانیدن دسیسه دیب بیلهدی. اونینگ سلاموطندارگه ایتیشیچه، نفرلری امنیتنی تأمین ایتیش اوچون قورال آلگن، خلق اوستیگه زورهوانلیک قیلیش اوچون ایمس.
اما، رستاق تومنی یشاوچیلریدن بیری ارباب شریفنینگ سلاموطندارگه ایتیشیچه، کمیده بیر یریم آی آلدین، پیرمقلنینگ نفرلری، جیینینینگ اوییگه هجوم اویوشتیریب و اونی کلتکلگن. ارباب شریفنینگ کوپهیتیریشیچه، اوشبو قضیهنی تیکشیریش اوچون پولیسگه مراجعت قیلگن، بیراق پیرمقلنینگ نفرلری تامانیدن کلتکلنگنی باعث، سیسی بوغزیده قاتگن.
محلی رسمیلردن هیچ بیری، بو توغریده سلاموطندار بیلن صحبت اوتکزیشگه حاضر بولمهگن؛ بیراق، جمهور رییس سوزلاوچیسی اورین باسری شاهحسین مرتضوینینگ ایتیشیچه، رستاق وضعیتینی تیکشیریش اوچون سونگی کونلرده بیر هیأت یوباریلگن و قولگه کیریتیلگن نتیجه تیکشیریلگنیدن کیین، حکومت ایشگه کیرهدی.
