اسمی سیرسقلنیشینی ایسته گن امنیتی منبعنینگ سلاموطندارگه ایتیشیچه، اوتگن کیچه امنیتی کوچلر غنیخیل تومنیده اوتکزگن عملیاتده ۵ تینچ اهالینی اولدیرگن و باشقه ۵ کیشینی هم اوزلری بیلن بیرگه آلیب کیتگنلر.
منبعگه کوره، اولدیریلگن شخصلر تورلرکی منطقهسیده تاووق سقلش ایشی بیلن مصروف ایکنلر.
غنیخیل تومنی حاکمی هم امنیتی کوچلر ۵ تینچ اهالینی اولدیریب و باشقه ۵ کیشینی اوزلری بیلن آلیب کیتگنلیگینی تصدیقلهگن.
ننگرهار معارف ریاستینینگ سوزلاوچیسی آصف شینواری، اولگنلر ارا ایکی اوقووچی هم شامل دیگن.
اما ننگرهار والیسینینگ سوزلاوچیسی عطاالله خوگیانینینگ سلاموطندارگه ایتیشیچه، اوتگن کیچه ملی امنیت ریاستینینگ ۰۲ خاص قطعهسی طالبلرنی نابود قیلیش نیتیده عملیات قیلگن ایکنلر نتیجهده ۵ کیشی اولگن و باشقه بیش کیشی هم قولگه آلینگن.
جناب خوگیانیگه کوره، حاضرگه قدر اولدیریلگن و قولگه آلینگنلر کیملیگی انیق بولمهگن.
غنیخیل تومنی باشلیغی عبدالوهاب هم حادثهنی تأیید قیلهدی، اما بوبارهده انیق معلومات بیرمیدی.
بیر هفته آلدین هم غنیخیل تومنیده تشقی کوچلر عملیاتی نتیجهسیده ۳ تینچ اهالی سمنتی بلوک توزه تیش ایشی بیلن مصروف ایدیلر اولدیریلدی.
