هلمند پولیس قومندانلیگی رسمیلریدن بیرینینگ ایتیشیچه، مذکور ولایتنینگ سنگین تومنیگه حاضرگچه یاردمچی حربی کوچ یوباریلمهگن.
منبع آتی فاش ایتیلیشینی ایستمهی ایتیشیچه، اوشبو توقنهشووده حاضرگه قدر 27 پولیس هلاک بولگن و باشقه 13 تهسی یرهلنگن.
هلمند جنوبیدهگی سنگین تومنی اوتگن (یکشنبه کیچه) طالبلر گروهی نظارتیگه اوتدی.
مذکور تومن امنیه قومندانی محمد داوودنینگ آگاهلنتیریشیچه، طالبلرنی قورشاویده قالگن کوچلرنی قوتقریش خصوصیده یاردمچی کوچ یوباریلمهگن صورتده، مذکور کوچلر طالبلرنینگ قولیگه توشیشی ممکن.
هلمندده 215 میوند قول اردو سوزلاوچیسی محمدرسول زازینینگ سلاموطندارگه ایتیشیچه، سنگین امنیه قومندانلیگی و مذکور تومن بناسی پولیس کوچلری تامانیدن طالبلرگه قوییب یوباریلگن. اونگه کوره، حربی کوچلر، مذکور ایکی بنانی قیتهدن نظارتگه آلگن.
جناب زازی، بو توغریده آرتیقچه معلومات بیرمهگن؛ بیراق ایتیشیچه، حاضر منطقهده امنیتی کوچلر بیلن طالبلر اورتهسیده توقنهشوو دوام ایتماقده.
عین حالده، هلمند والیسینینگ اورین باسری محمدجان رسولیار، فیسبوک صحیفهسیده جمهور رییسدن، سنگین پولیس عسکرلرینینگ اولیمی تیکشیریلیشینی سورهگن.
جناب رسولیارنینگ یازیشیچه، سنگین و گرشک تومنلرینینگ زمبل و میرمنداب منطقهلریده کمیده 90 پولیب هلاک بولیب و یرهلنگن.
بیراق، پارلمان نمایندهلریدن بیری عبدالرحمان رحمانینینگ ایتیشیچه، سنگین تومنیده 290 امنیتی عسکر هلاک بولیب و باشقه کمیده 500 تهسی تن جراحت آلگن.
شونینگدیک، سنگین اجتماعی کینگشی عضوی غلامجان آکانینگ ایتیشیچه، طالبلر پولیس قومندانلیگی، تومن بناسی، شهردارلیک و تومن بازارینی نظارتگه آلگن. اونگه کوره، هلاک بولگن و یرهلنگن عسکرلرنینگ جسدلری، طالبلرنینگ نظارتیده قالگن.
شونینگدیک، غلامجاننینگ ایتیشیچه، امنیتی کوچلرنینگ برچه حربی جهازلری طالبلرنینگ قولیگه توشگن.
عین حالده، نمایندهلر کینگشی باشلیغی عبدالرؤوف ابراهیمی، بوگون (دوشنبه) مجلس ییغینیده، هلمند ولایتینینگ امنیتی وضعیتینی خواطرلی دیگن. جناب ابراهیمی، جمهور رییس و امنیتی ادارهلردن مذکور ولایت امنیتی وضعیتینی تیزلیک باشقریب و مجلس کمیسیونلریدن بو توغریده امنیتی رسمیلر بیلن صحبت اوتکزیشلرینی سورهدی.
هلمند نمایندهسی نسیمه نیازینینگ ایتیشیچه، مذکور ولایت امنیتی رسمیلری مخدره ماده قاچاقی بیلن مصروف و اوشبو ولایت امنیتی توغریسیده دقت قیلمهیدی.
خانم نیازینینگ ایتیشیچه، گرشک تومنی طالبلر نظارتیگه اوتگن صورتده، فراه و هرات ولایتلرینینگ قتناو یولی یاپیلیب و قندهار ولایتی سقوط تهدیدیگه روپهره بولیشی ممکن.
طالبلر سوزلاوچیسی قاری یوسف احمدینینگ، میدیالرگه یوبارگن پیامیده ادعا قیلیشیچه، اوشبو گروه جنگریلری، سنگین تومنینینگ بوتونلهی نظارتگه آلگن و توقنهشوو حاضرگه قدر ایکی تامان اورتهسیده دوام ایتماقده.
پارلمان نمایندهلریدن بیری عبدالجبار قهرمان انچه پیت آلدین امنیتی وضعیتنی تیکشیریش اوچون هلمند بارگن. اونینگ ایتیشیچه، سنگین تومنیده 900 خیالی پولیس بار ایکن. اونگه کوره، اوشبو تومنده یالغیز 115 حقیقی پولیس موجود، اولردن 55 تهسی محلی پولیس و باشقه 60 تهسی ملی پولیس بولگن.
