افغانستان حکومتی‌نینگ بلند مرتبه‌لی رسمیلری، اوتگن کون مملکت‌ده یوز بیرگن ییر قیمیرلش‌ده افغانستان‌نینگ توقیز ولایتیده جانی و مالی تلفات یوز بیرگن دیگن‌لر.
جمهور رییس‌لیک سرایی بیر خبرنامه ترقه‌تیب، مذکور ییر سیلکینیشی عاقبتی‌ده 115 کیشی حیاتدن کوز یومیب و 538 انسان تن جراحتی آلگن لیگی‌دن خبر بیرگن‌لر.
طبیعی حادثه‌لرگه ییتیشیش اوچون دولت‌نینگ ایشلری بوییچه وزیری ویس برمک‌نینگ سلام وطندارگه ایتیشتیچه، مذکور ییر قیمیرلش عاقبتی‌ده 7630 ییش اوی، 20 اداری بنا، 17 مسجد و 12 مکتب افغانستان‌نینگ 9 ولایتیده ویران بولگن. جناب برمک ییر قیمیرلش‌ده نورستان، بغلان، تخار، بدخشان، پنجشیر، پروان، ننگرهار، لغمان و کنر ولایت‌لریگه زیان ییتگن دیگن.
گزارشلرده، اوشبو ییر سیلکینیش‌ده بدخشان ولایتیده 9 کیشی هلاک بولگن، 20 نفر یره‌لنگن و 480 اوی ویران بولگن، نورستان ولایتیده 2 انسان قربان بولگن، 32 کیشی تن جراحتی آلگن و 380 بنا ایسه نورب توشگن بغلان‌نینگ 6 ولسوال‌لیگی‌ده 31 کیشی حیاتدن کوز یومگن، 105 ایسه یره‌لنگن و 1184 ییش بنا قولب توشگن کنرده 11 نفر عالم‌دن اوتگن و 69 نفر یره‌لنگن، ننگرهارده ایسه 5 کیشی اولگن و 10 نفر زخمی بولگن تخارده 12 اوقوچی هلاک بولیب 25 نفر تن جراحتی آلگن.
تخار محلی مسوول‌لری بوگون (سه‌شنبه) اوشبو ییر قیمیرلش‌ده حیاتدن کوز یومگن‌لر اوچون مخصوص تشییع مراسم اوتکزگن‌لر.
افغانستان حکومتی ییر قیمیرلش‌ده زیان کورگن اویلر تَنیلیشینی سوره‌گن. جمهور رییس‌نینگ سوزلاووچی‌سی سید ظفر هاشیمی‌نینگ سوزلریگه کوره، مذکور طبیعی حادثه‌ده زیان گورگن لرگه یاردم ییتکریب بیریش جریانی باشلنگن.
طبیعی حادثه‌لرگه قرشی کوره‌شیش اداره‌سی‌نینگ مسوول‌لری، یاردم‌لر زیان ییتگن محل‌لرگه ییتکزیلگن دیگن‌لر و باشقه کومک‌لر ایسه کیلگوسی کونلرده ییتکزیله‌دی.
اوتگن کون (دوشنبه) یوز بیرگن ییر قیمیرلش‌نینگ کوچی 7.7 درجه ریشتر بولگنی انیق لنگن. اوشبو طبیعی حادثه اوتگن کون توش‌دن سونگ ساعت 1:30ده افغانستان، پاکستان، هند، چین و آسیایی دولت‌لری‌نینگ بیر قسمی‌نی تیتره‌تگن ایدی.
ییر قیمیرلش مرکزی بدخشان ولایتی فیض آباد شهری جنوب شرقی‌نینگ 70 کیلو مترلیگی‌ده واقع بولگن. ایتیلشیچه، ییر قیمیرلش 200 کیلو متر چقورلیک‌ده یوز بیگرن.
ایتییشیچه، مذکور طبیعی حادثه نتیجهسیده پاکستانده کوپ تلفات یوز بیرگن.
