سیلاولر ایرکین کمیسیونی مسؤوللرینینگ ایتیشیچه، سیلاولر تیزیمیگه اصلاحات کیریتیش کمیسیونینینگ مسؤولیتی، جمهور رییس بویروغی اساسیده آچیقلنگن؛ بیراق اوشبو کمیسیون فرمان مادهلریگه دقت قیلمهی و شونچه پیتده هیچ قنقه اصلاحات کیریتهآلمهگن.
سیلاولر تیزیمیگه اصلاحات کیریتیش کمیسیونی نیچه آی اوتکنیدن کیین، جمهور رییس غنینینگ بویروغی صادر ایتیلگنیدن سونگ ایشگه باشلهدی و انچه پیتدن کیین، اوز تکلیفلرینی 10 مادهگه ملی بیرلیک حکومتیگه ارایه ایتدی. جمهور رییس، اوشبو کمیسیوننینگ 7 تکلیفینی قبول ایتیب و باشقه 3 تکلیفینی قیتهدن تیکشیریلیشی خصوصیده، مذکور کمیسیونگه یوباردی.
سیلاولر کمیسیونی سوزلاوچیسی نورمحمد نورنینگ (دوشنبه کون) کابلده بیر خبری ییغینده ایتیشیچه، سیلاولر تیزیمیگه اصلاحات کیریتیش کمیسیونی حاضرگچه ایشینی یخشی صورتده عملگه آشیرهآلمهگن. جناب نورگه کوره، سیلاولر تیزیمیگه اصلات کیریتیش کمیسیونی یالغیز سیلاو کمیسیونلرینینگ شکلی و کورینیشیگه دقت قیلهدی و اساسی قیینچیلیکلر حاضرگچه اوز جاییده قالگن.
اونینگ کوپهیتیریشیچه، مذکور کمیسیون، سیلاولر ایرکین کمیسیون باشلیغی و کمیشنرلرینینگ چیتلنتیریشینی ایستهیدی و سیلاولر تیزیمیگه اصلاحات کیریتیش کمیسیونینینگ، بو عملی مملکت جمهور رییسینینگ بویروغیگه قرشی دیر. جناب نورگه کوره، سیلاو کمیسیونلریده هر قنقه قیینچیلیک یوزبیرگن صورتده، حکومت و سیلاولر تیزیمیگه اصلاحات کیریتیش کمیسیونی مسؤول بولهدی.
سیلاولر ایرکین کمیسیونینینگ سوزلاوچیسی، اوشبو ییغینده جمهور رییسدن اوز بویروغیدن حمایت ایتیشی و سیلاولر تیزیمیگه اصلاحات کیریتیش کمیسیونی مسؤولیتیدن تشقری عمل قیلیشگه رخصت بیرمسلیگینی سورهدی. شونینگدیک جناب نورنینگ ایتیشیچه، سیلاولر تیزیمیگه اصلاحات کیریتیش کمیسیونینینگ باشلیغی بیلن اورین باسری، صلاحیتلریدن تشقری حرکت قیلهدی.
اونگه کوره، مذکور کمیسیوننینگ اجرایی صلاحیتی بارگه اوخشهیدی؛ اصلده بو عمل جمهور رییس بویروغیگه قرشی دیر.
عین حالده، سیلاولر تیزیمیگه اصلاحات کیریتیش کمیسیونینینگ اورین باسری صدیقالله توحیدی، سیلاولر ایرکین کمیسیونی رسمیلرینینگ بیاناتلرینی خبرسیزلیک بیلیب ایتیشیچه، سیلاولر تیزیمیگه اصلاحات کیریتیش کمیسیونینینگ برچه عملی جمهور رییس بویروغلریگه اساس آلغه بارهدی. جناب صدیقی سلاموطندار بیلن تلیفون علاقه قوریب ایتیشیچه، جمهور رییس بویروغی اساسیده، سیلاولر ایرکین کمیسیونینینگ تیزیمینی اوزگرتیریش اولرنینگ اساسی ایشلریدن بولگن.
جناب توحیدیگه کوره، جمهور رییسنینگ تقنینی بویروغی اساسیده، سیلاولر ایرکین کمیسیونینینگ کمیشنرلرینی سیلش خصوصیده کمیته ایجاد ایتیلهدی و بو کمیتهنینگ ایشی سیلاولر ایرکین کمیسیونی اعضالرینینگ نامزدلری صفتیده 21 کیشینی تانیشتیریش دیر. توحیدیگه کوره، اوندن کیین جمهور رییس، مذکور کیشیلردن 7 تهسینی سیلاولر ایرکین کمیسیونینینگ اعضالری صفتیده، تعیینلشی ممکن.
سیلاو کمیسیونلریده اصلاحات کیریتیش، ملی بیرلیک حکومت تشکیل ایتیلیشی خصوصیده، جمهور رییس بیلن اجراییه باشلیغی اورتهسیده قول قوییلگن سیاسی کیلیشوولردن بیری ایدی.
