قندهار، قندوز و بدخشان ولایتی نینگ امنیتی منبعلری و محلی مسئوللری بو ولایتلرده امنیتی کوچلرگه تلفات ییتیشگنیدن خبر بیریشگن. اولرنینگ ایتیشلریچه، مذکور هجوملرده امنیتی کوچلردن ۱۵ تهسی هلاک و باشقه ۱۳ تهسی یرهلنگن.
قندهار ولایتیدن خوفسیزلیک بیر منبع نینگ ایتیشیچه، طالبان اوتگن کیچه بو ولایت شاهولیکوت تومنی نینگ «زنگیتان» منطقهسیده جایلشگن اردو کوچلری نینگ بیر قرارگاهی اوستیگه هجوم قیلگن. مذکور منبع آتی فاش ایتیلیشی نی ایستمهی سلاموطندارگه ایتیشیچه، اوشبو هجومده اردو کوچلریدن ۶ تهسی هلاک و باشقه ۷ تهسی ایسه یرهلنگن.
اونینگ کوپهیتیریشیچه، بو حادثهدن کیین اوشبو تومنده امنیتی کوچلر آرقهلی اویوشتیریلگن هوایی هجومده طالبان گروهی نینگ قیزیل قطعه قومندانی شامل ۴۰ اعضاسی هلاک ایتیلگن.
۲۰۵ اتل قول اردو قومندانلیگی و قندهار پولیس قومندانلیگی مسئوللری بو حادثه توغریسیده اوز خبرسیزلیکلرینی بیلدیریشگن.
عین حالده، قندوز ولایتی کینگش اعضاسی فوزیه یفتلی نینگ ایتیشیچه، طالبان گروهی اوتگن کیچه قندوز شهری نینگ «شینواریها» منطقهسیده جایلشگن بیر پولیس پوستهسی اوستیگه هجوم قیلگن کیم نتیجهده، مذکور ولایت پولیس قومندانلیگی نینگ سیار تولی قومندانی ۵ عسکر بیلن هلاک و شونینگدیک باشقه نیچه پولیس یرهلنگن.
قندوز امنیتی مسئوللری بو توغریده سوزلش گه حاضر بولمهگن.
قندوز حاکمی سوزلاوچیسی عصمتالله مرادی بو خبرنی تصدیقلب ایتیشیچه، بو هجومده ۵ محلی و ملی پولیس جان بیرگن و باشقه ۴ پولیس ایسه یرهلنگن. اونینگ کوپهیتیریشیچه، اوشبو هجومده ۱۰ طالب هلاک و باشقه ۶ طالب ایسه یرهلنگن.
قندوز حاکمی سوزلاوچیسی گه کوره، اوتگن کیچه امامصاحب تومنیده امنیتی کوچلر آرقهلی یولگه قوییلگن عملیاتده ۳ طالب هلاک و باشقه ۲ طالب یرهلنگن.
بدخشان ولایتیده اردو نینگ ایکینچی لواسیدن بیر خوفسیزلیک منبع نینگ ایتیشیچه، طالبان گروهی شنبه کیچه ارگو تومنی اوستیگه هجوم قیلگن کیم نتیجهده، امنیتی کوچلردن ۳ تهسی هلاک و باشقه ۲ تهسی یرهلنگن. منبع گه کوره، امنیتی کوچلر بو تومن نینگ «گندهچشمه» منطقهسیده هوایی هجوم اویوشتیرگن و نتیجهده ۶ طالب هلاک و باشقه ۵ طالب یرهلنگن.
طالبان بو هجوم اویوشتیریلگنی توغریسیده هیچ بیر نرسه دیمهگن. طالبان نیچه ولایتده امنیتی کوچلر پوستهلری اوستیگه هجوم قیلگن بیرحالده، افغانستان دولتی نینگ هیأتی طالبان گروهی بیلن صحبت اوتکزیش اوچون قطر بارگن.
ایرته (دوشنبه ۲۴- سنبله) قطر پایتختی دوحه ده افغانستان دولتی نینگ هیأتی و طالبان گروهی آرهسیده رسمی شکلده افغانستانلیکلرارا سوزلشوولر باشلهنیشی خصوصیده قرار قیلینگن.
