کابل شهری اوقوتووچیلریدن بیرقطاری خلق ارا اوقوتووچیلر کونیدن نشانله‌گن بیرچاغده ایتیشیچه، حکومت بیرگن وعده‌لرینی عمل‌گه آشیرمه‌ی، اولرنی الده‌گن.
اوقوتووچیلرگه کوره، حکومت اولرگه ییر ترقه‌تیش و شونینگ‌دیک آی‌لیک‌لرینی کوپه‌یتیریش خصوصیده سوزبیرگن ایکن، بیراق حاضرگچه اوشبو سوزلریدن هیچ بیری‌گه عمل قیلمه‌گن. اولرنینگ ایتیشیچه، آی‌لیک‌لری جوده آز دیر و بو آی‌لیک‌لری عایله‌لری‌نینگ اون کونلیک خرجتی‌گه ییتیشمه‌یدی.
13- میزان خلق ارا اوقوتووچیلر کونی‌گه ماس بولگن. افغانستان معارف وزیرلیگی، اوشبو کوندن مملکت اوقوتووچیلری‌گه قرشی قیین‌چیلیک لر کونسایین کوپه‌ییب باره‌یاتکن بیرچاغده نشانله‌یدی.
بیراق، معارف وزیری اسدالله حنیف بلخی (دوشنبه کون؛ 13- میزان) ده ایتیشیچه، مملکت اوقوتووچیلری‌نینگ ایسته‌گی خصوصیده سعی و حرکت قیله‌دی.
جناب بلخی، کابل‌ده خلق ارا اوقوتووچیلر کونیدن نشانلش مراسمی‌ده سوزگه چیقیب ایتیشیچه، اوشبو وزیرلیک اوقوتووچیلر وضعیتی یخشی‌لنیشی خصوصیده ایریم برنامه‌لرنی قولگه آلگن. اونگه کوره، مذکور وزیرلیک، بناسی و میز وچوکی‌سی بولمه‌گن مکتب‌لرنی توزه‌تیش‌گه قادر، بیراق اوقوتووچیلر آی‌لیگی کوپه‌یتیریلیشی توغری‌سیده بودجه اجره‌تیلیشینی کوته‌دی.
معارف وزیری‌نینگ ایتیشیچه، اوقوتووچیلر وضعیتی یخشی‌لنیشی خصوصیده بو وزیرلیک سعی و حرکت قیله‌دی. جناب بلخی‌نینگ اوقوتووچیلرگه سوزبیریشیچه، اولرنینگ ایسته‌گی عمل‌گه آشیریلیشی توغری‌سیده هیچ قنقه سعی و حرکت‌دن وازکیچمه‌یدی.
باشقه تاماندن، اوقووچیلردن بیرقطاری حکومت‌دن اوقوتووچیلر قیین‌چیلیگی‌گه دقت قیلیشینی سوره‌دی.
معارف وزیرلیگی رقمی‌گه کوره، حاضر مملکت بویلب 17 مینگ مکتب فعال دیر و 217 مینگ اوقووچی اوشبو مکتب‌لرگه درس و تعلیم آلماقده.
مملکت جمهور رییسی محمد اشرف غنی، بیرینچی کون ایشلریده ینه آلتی آی‌ده اوقوتووچیلرگه ییر ترقه‌تیشنی تیلگه آلگن ایدی؛ بیراق حاضر حکومت ایشی‌دن بیر ییل اوتیب بارماقده، ییردن درک یوق دیر.
کابل مکتب‌لری اوقوتووچیلریدن بیرقطاری، جاری ییل کوکلم موسومی‌ده حکومت سوزلری عمل‌گه آشیریلمه‌گنی باعث، درس بیریش‌دن وازکیچگن ایدی.
