مملکتدهگی موجود یوزمه یوز اوروش بیر آز یکونلنگن، بیراق حاضرگچه بو اوروشلردن قالگن ماینلرگه قطار یشاوچیلر قربان بولهدی. عین حالده، قطار ایرککلر و عیاللر اوشبو ماینلرنی اوچیریش خصوصیده، اوزلرینی خطرگه قویهدی.
ماین تازهلاوچی اختر محمد، 7 مرته ماین پارتلهشیگه دوچار بولگن. او 6 ییلدن بویان ماین تازهلشگه قول اورگن و شونچه مدتده 4767 مایننی اوچیرگن. اوشبو کیشینینگ ایتیشیچه، ناتو کوچلری اوچیرهآلمهگن ماینلرنی اوچیریشگه قادر بولگن.
اوشبو ماین تازهلاوچی کیشی، باتورلیگی و فدارکارلیکلری باعث، تخار ولایتیده شهرت قازانگن، دیمک برچه یشاوچیلر اونی قهرمان صفتیده تانیدی. اختر محمد، حاضر تخار پولیس قومندانلیگی ماین تازهلش بولیمی آمری دیر. اونینگ سلاموطندارگه ایتیشیچه، «قویاش 1387- ییلدن بویان ماین اوچیریش و کشف ایتیش بولیمیده تخار مرکزی و باشقه تومنلریده خذمت قیلهمن و شونچه مدتده تیک اوچیر بمبلریدن باشلب قویاش ماینلری و باسیلهدیگن نارنجکلرنی اوچیرگن من.»
دیمک بو کیشینینگ، ماین و پارتلاوچی مادهنی اوچیریش اوچون بارهدیگن چاغیده کورسنگیزلر، کمیده 86 کیلوگرام آغیرلیگی بولگن کییمنی کییب پارتلاوچی ماده تامان یول آلهدی. بیراق، شوندهی بیر شکلده هم تنهسی نیچه مرته یرهلنگن و یوقاری لبیدن بیر قسمتینی ماین پارچهسی کوترگن.
اختر محمدنینگ ایتیشیچه، ماین اوچیریشگه عاشق و بو ایشدن لذتلنهدی. اونینگ کوپهیتیریشیچه، خلق جانینی قوتقریش اوچون، اوز علاقهسی بیلن بو وظیفهنی تنلهگن.
بو کیشینینگ ایتیشیچه، بیر مرته چیت ایللیک کوچلر تخار ولایتی کینگشی بناسیده بیر کمپیوترده جایلشتیریلگن مایننی کشف ایتگن، بیراق اوچیریشیگه قادر بولمهی و بنانی پارتلهتیشگه قرار قیلگنلر، اما اختر محمد، ایلگریگه قدم قوییب و ماین اوچیرگن.
اختر محمدنینگ ایتیشیچه، برچه حیرتده قالگن و بیر افغانستانلیک بوندهی ایشگه قادر بولگنی خصوصیده ایشانمهگنلر. اونینگ کوپهیتیریشیچه، بو ایشدن کیین، ولایتی کینگش ریاستی و مملکت ملی امنیتی تامانیدن تقدیرلنگن.
شونینگدیک، تخار پولیس قومندانلیگی امنیت آمری آغا داوودنینگ ایتیشیچه، اختر محمد یوزلرچه انساننینگ جانینی قوتقرگن. اوشبو امنیتی رسمیگه کوره، اختر محمدنینگ حضوری باعث، تخار پولیس قومندانلیگی ماین تازهلش بولیمی کوپینچه یوتوققه ایریشگن.
مملکت بویلب هر آی اونلرچه ماین تازهلاوچی کیشی، ماین و پارتلاوچی مادهلرنی کشف ایتیب و اوچیرهدیگن چاغیده یرهلنیب و هلاک بولهدی، بیراق اولرنینگ باتورلیگی و فداکارلیگیدن ایسلنمهی و تیزلیکده ایسدن چیقاریلهدی.
