له طبیعي پېښو سره د دولت وزارت د ۳،۳ میلیونو ډالرو په ارزښت تړون لاس‌لیک کړ

طبیعي پېښو ته د رسېدنې په چارو کې د دولت وزارت د کابل ښاروالۍ، سیمه ییزو ارګانونو، د کور او ښارجوړونې وزارت او هبیتات ادارې سره بېلابېل څلور اړخیز تړونونه لاسلیک کړل.

دغه وزارت د جاپان هېواد او هبیتات موسېسې په مالي مرستو د ۳،۳ میلیونو ډالرو په ارزښت د دې تړون له مخې په کابل او مزار شریف ښارونو کې په څلورو برخو زلزله، سیلابونو، د ځمکې ښویېدلو او د اوبو راپورته کېدلو پر وخت د خوندیتوب او زیانونو مخنیوي په موخه خلکو ته عامه پوهاوی ورکول کېږي؛ په دې برخه کې به څېړنې کوي، ترڅو د مخنیوي لارې چارې ورته موندل شي.

غونډه کې طبیعي پېښو ته د رسېدنې په چارو کې د دولت وزیر ویس برمک وویل، د پېښو له رامنځته کېدو مخکې لازم تدابیر اړین دي؛ نو ځکه د ۳،۳ میلیونو ډالرو په ارزښت دغه څلور اړخیز تړون لاسلیک کوي.

برمک وايي، د دې تړون پربنسټ به، په کابل او مزار شریف کې د زلزلې، اور لګېدنې او د اوبو راپورته کېدلو د مخنیوي په موخه د خطر سیمې په نښه او په دې برخه کې به خلکو ته عامه پوهاوی ورکړي.

نوموړي وویل، د نړیوال بانک په مرسته یې د پېښو په مخنیوي کې په ۵ مهمو برخو لکه زلزله، سیلابونه، د واروې ښویېدنې، وچ کالي او د ځمکې د ښویېدو د مخنیوي په پار په یوې ملي ستراتېژي هم کار پیل کړی، چې درې میاشتې وروسته به یې چارې بشپړې او عملي بڼه به غوره کړي.

غونډې ته د کابل ښاروالۍ سرپرست عبدالله حبیبزي وویل، چې کابل ښار د جدي زلزلې له خطر سره مخ دی، نو د دغه تړون له مخې ۱۰۰ کورونه د نمونې په شکل جوړوي، چې د زلزلې خطر په کې ونه وسي او همدا ډول د طبیعي پېښو د مخنیوي په برخه کې خپل ظرفیت ته وده ورکوي.

غونډې ته د ښار او کور جوړونې وزارت چارواکي وویل، چې د دې تړون له مخې د کور جوړونې وزارت ونډه پالیسي جوړونکې ده او دوی هڅه کوي په پېښو کې زیانونه صفر او یا یې هم کچه راټیټه کړي.

دغه راز د هبیتات موسېسې په استازیتوب یوریشیا وویل، د دې تړون له مخې په کابل او مزار کې ۶۰۰۰ کورنۍ په عملي او مستقیمه بڼه له دغې پروژې ګټه واخلي.