«زموږ قهرمانان» د کابل په پلیو لارو کې

ځېنو ځوانانو له امنیتي ځواکونو نه د ملاتړ په پار په کابل کې د سړک‌غاړې انځوریز نندارتون جوړ کړي. دې ځوانانو ـ چې د زرنګار پارک پلې لارې د امنیتي ځواکونو په بېلابېلو انځورونو ښکلې کړې‌دي ـ وايي چې نندارتون یې د امنیتي ځواکونو د زحمتونو د احترام په پار جوړ کړی‌دي.

د نندارتون جوړوونکي وايي چې د دې نندارتون په جوړولو سره امنیتي ځواکونو ته وښيي چې د هېواد په هره لېرې پرته سیمه کې یوازې نه‌دي. د دې نندارتون دوه تنه جوړوونکي عبدالخالق میزايي او وحیدشاه احمدي وايي چې امنیتي ځواکونو د خلکو قهرمانان دي او د دا ډول د نندارتونونو په جوړولو سره غواړي امنیتي ځواکونه تشویق کړي.

کابل‌ښاریان هم د دې نندارتون هرکلی کوي او وايي چې امنیتي ځواکونه په ډېرو لږو تجهیزاتو د هېواد دفاع کوي.

دوه کابل‌ښاریان الیاس او خالد ستاکنزی وايي، امنیتي ځواکونه په یخو او ګرمو شپو کې د هېواد له هرې لوېشتې نه په سختو شرایطو کې دفاع کوي او موږ یې ملاتړي یو.

د محمد هارون په نوم یو سرتېری وايي، کله چې له‌دې پلې لارې تېرېد او د امنیتي ځواکونو انځورونه یې ولیدل؛ احساس یې کړه چې د هېوادوالو له‌پاره یې زحمتونه بې‌ځایه نه‌دي تللي. هارون زیاتوي، د خلکو ملاتړ د دې لامل کېږي چې دوی په لوړه روحیه د هېواد د دوښمنانو په مقابل کې وجنګېږي.

تېره میاشت ولسمشر غني په یو ویډیويي پيغام کې ویلي وو چې په تېرو ۴کالونو کې شاوخوا ۳۰زره امنیتي ځواکونه وژل شوي‌دي.