د ننګرهار یو شمېر مدني فعالانو په اعتراضیه غونډه کې د دې ولایت والي ګلاب منګل کمزوری وبللو، د فساد او بې کفایتي تورونه یې پرې ولګول.
دغو مدني فعالانو وویل، په ننګرهار کې د ناامنۍ، داعش ډلې د پیاوړتیا، انسان وژنو او تښتونو، پراخ فساد او د ملي شتمنیو غصب په پار دې ګلاب منګل محکمې ته ور وپېژندل شي.
د ننګرهار د مدني فعالانو په استازیتوب خالد سادات وویل، ګلاب منګل په هلمند، لغمان او نورو ادارو کې ناکامه او ناکاره چارواکي ثابت شوی و؛ د دولت له خوا په ننګرهار ورتپل شوی دی.
دی وایي، د والي د بېکفایتۍ له امله په دې ولایت کې پراخ لاریونونه شوي؛ له همدې کبله یې ګوښه کول او علني محاکمه غواړو.
مدني فعالان وایي، د ننګرهار والي د کامې ولسوالۍ یو شمېر ښوونکي له تېرې جمعې راهیسې په ناقانونه توګه بندیان کړي دي.
د دوی په خبره، د کامې ولسوالۍ ښوونکو د ولسمشر د فرمان له مخې د ورکړل شوې نومرې د حق غوښتنې په پاره اعتصاب کړی و.
خو د ننګرهار د والي ویاند اعطاالله خوږیاڼۍ د مدني فعالانو څرګندونې ردوي او وایي، دا ډول غونډې د ننګرهار په زیان دي.
خوږیاڼي وویل، په ننګرهار کې د فساد پر ضد مبارزه شوې، د غصب مخنیوی شوی او په دې لړ کې جدي اقدامات ترسره شوي دي.
مدني فعالان وایي، که حکومت د پنج شنبې تر ورځې د دوی غوښتنې ونه مني، پراخ لاریونونه به وکړي.
