د افغانستان د سوداګرۍ او صنایعو خونې مسوولین وايي، چې د نشه يي توکو قاچاق په اړه د ازبکستان او د سیمې یوشمېر نورو هېوادو اندېښنو له امله افغانستان نه شي کولی، چې د افغانستان ـ چین ریل پټلۍ له لارې خپل سوداګریز توکي نورو هېوادونو ته صادر کړي.
سره له دې چې د افغانستان ـ چین ریل پټلۍ له پرانیستنې ۶ میاشتې تېریږي؛ خو افغان سوداګر اوس هم نه شي کولی خپل سوداګریز توکي له دې لارې د منځنۍ اسیا هېوادونو ته صادر کړي.
د افغانستان د سوداګرۍ او صنایعو خونې د عامل پلاوي رییس عبدالقدیر بهمن د افغانستان ـ چین ریل پټلۍ له لارې د افغانستان د محصولاتو نه صادریدو لامل د ازبکستان له خوا د نشه يي توکو او امنیتي ګواښونو په اړه اندېښنې بولي.
بهمن ټینګار وکړ، په هغه صورت کې چې له دې لارې د افغانستان د صادراتو ستونزې حل نه شي؛ د افغانستان سوداګریزې اړیکې به د سیمې له هېوادونو سره ترینګلې شي.
عبدالقدیر بهمن زیاته کړه، افغان حکومت باید د سیمې له هېوادونو سره په همغږۍ داسې میکانیزم جوړ کړي، چې د دوی اندېښنې حل شي.
په همدې حال کې د سوداګرۍ او صنایعو وزارت معین قربان حقجو سلام وطندارته وویل، چې حکومت د افغانستان ـ چین له لارې د صادراتو ستونزو حل په اړه هوکړه جوړه کړې او اوزبکستان ته يي استولې.
د حقجو پروینا، که ازبکستان دا هوکړه لاسلیک کړي له دغې لارې به د افغانستان د صادراتو ستونزې هوارې شي.
د افغانستان ـ چین له لارې د افغان سوداګرو صادراتي توکو مخنیوي په هېواد کې د افغان سوداګرو نیوکې هم له ځان سره درلودې.
