د هرات زیاتره تاریخي ودانۍ د نشو او خځلو مرکزونه ګرځېدلي

د هرات ولایت ځینې اوسېدونکي وایي، د دې ولایت یو شمېر لرغونو تاریخي ودانیو ته د اړوندو مسوولینو نه‌پاملرنې او بې‌غورۍ له امله دغه ځایونه په نشه‌یي توکو د روږدو کسانو او د ښار د خځلو په مرکزونو بدل شوي دي.

د دې ولایت یو تن اوسېدونکي غلام رسول سلام‌وطندار سره په خبرو کې وویل، چې د هرات ښار اوومې ناحیې "مُصَلا او زبیده" تاریخي بڼ د ښار خځلو او روږدو کسانو په مرکز بدل شوی دی.

غلام رسول وايي، چې د هرات ځینې لرغونې تاریخي ودانۍ جدي بیارغونې ته اړتیا لري او د مسوولو کسانو نه پاملرنې له امله زوال سره مخ دي.

د عبدالحکیم او حفیظ په نومونو د هرات دوو نورو استوګنو وویل، چې لرغوني تاریخي وداني کلتوري میراث او هویت باید حکومتي مسوولین په دې برخه کې جدي پام وکړي.

دوی له ځايي چارواکو د دې تاریخي ودانیو د خوندیتوب او پاکوالي غوښتنه کوي.

د هرات ولایت د اطلاعاتو او کلتور ریاست مسوولین د یو شمېر لرغونو ودانیو ورانېدل مني او وايي، چې په دې وروستیو کلنو کې څو تاریخي ودانۍ یې بیارغولي او د نورو تاریخي ودانیو روغول وخت ته اړتیا لري.

د اطلاعاتو او کلتور ریاست د فرهنګي او هنري اثارو امر جاوید ضرغام سلام وطندارته وویل، د لازمې بودیجې نه شتوالي له امله په دې ولایت کې زیاتې تاریخي ودانۍ له بیارغونې پاتې دي.

ضرغام وايي، ولسي خلک هم د لرغونو ودانیو ساتنې په برخه کې همکاري نه کوي او هغه شمېر تاریخي وانۍ چې د خلکو استوګنې په سیمو کې دي؛ د کلاګانو دېوالونه یې پرې ورتېر کړي دي.

دی وايي، له څلورو کلونو راهیسې یې ۱۰ هغه غاصبین څارنوالۍ ته ورپېژنلي، چې د هرات لرغونو سیمو کې یې غصب کړی و.

د راپورونو له مخې هرات ولایت شاوخوا ۸۰۰ لرغونې تاریخي ودانۍ لري.