د ولسي جرګې د نن ورځ په عمومي غونډه کې یو شمېر وکیلانو له افغان حکومت پرته په مسکو کې درې اړخیزه ناسته د اندېښنې وړ وګڼله او زیاته یې کړه، دا به ناوړه پایلې ولري.
وکیلانو وویل، سره له دې چې افغان دولت له روسیې او چین سره ښې اړیکې لري؛ خو ولې د افغانستان حکومت له ګډون پرته داسې غونډه جوړوي.
د ولسي جرګې رييس عبدالروف ابراهيمي وايي، طالبانو پخوانی دريځ بدل کړی او پر وینا یې له پاکستان سربېره روسیه، ایران او چین یې هم ملاتړ کوي.
دی زیاتوي، چې روسیه د ترهګرۍ پر ضد مبارزه کې شریک او چین بیا له افغانستان سره ښې اړيکې لري؛ نو دا ډول ناستې د پوښتنې وړ دي.
عبدالروف ابراهیمي وايي، افغانستان له ټولو ګاونډیو هېوادونو سره ښې اړیکې لري او د هغوی په کورنيو چارو کې لاس وهنه هم نه کوي؛ نو افغان چارواکي باید د دوی په نه موجودیت کې د مسکو جوړې شوې غونډې په اړه سپیناوی وغواړي.
ابراهيمي زیاته کړه، افغانستان له امریکې، ناټو او روسیې سره تړونونه لري او افغانان باید د هغوی ترمنځ د رقابتونو قرباني نه شي.
دغه راز د ولسي جرګې غړي عبیدالله بارکزي وویل، دا ډول غونډه ښيي، چې له امریکې، ناټو او روسیې سره لاسلیک شویو تړونو او د سولې په تړاو خبرو پایله نه ده ورکړې.
بارکزي وویل، د نړۍ ځواکمن هېوادونه غواړي د خپلو ګټو له پاره افغانستان د جګړې په ډګر بدل کړي او زیاته یې کړه، پاکستان او ایران د جهاد، د وخت په څېر په دې جګړه کې د خپلو ګټو په ترلاسه کولو بوخت دي.
عبیدالله بارکزي له حکومته غوښتنه وکړه، چې د مسکو د ناستې په اړه دې واضح دريځ خپل کړي.
د مسکو د ناستې په اړه د افغانستان د بهرنيو چارو وزارت له غبرګون وروسته د افغانستان له پاره د روسیې ځانګړي استازي ضمیر کابلوف رسنيو سره په خبرو کې وویل، په مسکو کې درې اړخیزه ناسته د افغانستان ستونزې حل له پاره د سیمه ییزو همکاريو رامنځ ته کولو په خاطر جوړه شوې وه.
کابلوف ویلي، چې له دوی د افغانستان د سولې په اړه غوښتنه نه ده شوې.
