د روسيې ولسمشر ولادیمیرپوتین وايي، چې له امریکا د ۳۵ روسي ډیپلوماتانو د ویستلو په بدل کې به له روسيې د متحده ایالاتو ډيپلوماټان و نه باسي، خو واشنګټن لهپاره جدي سرخوږی جوړولی شي.
څو ورځې وړاندې د بارک اوباما حکومت له خوا د متحدو ایالتونو د ولسمشرۍ په انتخاباتو کې د روسیې د لاسوهنې په اعتراض له واشنګټنه ۳۵ روسي دیپلوماتانو وویستل.
د هغه په غبرګون کې پوتین وايي، چې هیڅ امریکايي ډیپلومات به له مسکوه و نه باسي.
پوتین وايي، چې هیڅکله به د امریکا په شان له نامسوولانه ډپيلوماسۍ کار وا نه خلي.
هغه د اوباما پر ادارې تور پورې کړ، چې دغه کړنه يې نهایت منفي بافي ده.
د روسيې ولسمشر وویل، چې د تېرې پنجشنبې په ورځ (ډسمبر۲۹مه) له امریکا خاورې ۳۵ ایستل شوي روسي دیپلوماتان او د هغوی د کورنیو غړي به خپلو کورونو ته راشي او له خپلوانو او دوستانو سره به د نوي کال جشن او خوښۍ ولمانځي.
د بارک اوباما اداره پر روسیې تور پورې کړی، چې د امریکا په ولسمشریزو ټاکنو کې يې لاسوهنې کړي او هرڅه يې د دغه هېواد نوي ولسمشر ډونالډ ټرامپ په ګټه پای ته رسولي دي.
دا په داسې حال کې ده، چې د روسیې د بهرنیو چارو وزیر سرګی لاوروف پوتین ته وړاندیز کړی و، چې باید د واشنګټن د اقدام په ځواب کې ۳۱ امریکايي دیپلوماتان د روسيې له خاورې وباسي.
هغه وویل:"د خواشينۍ ځای دی، چې د ولسمشر بارک اوباما اداره په دې ډول خپل کار پای ته رسوي، خو له دې سره سره زه ده او کورنۍ ته یې د خوشاله نوي کال هیله کوم."
په پام کې ده، چې د امریکا نوی منتخب ولسمشر ډونالد ټرمپ د نوي زیږدیز (۲۰۱۷م) کال د جنورۍ په ۲۰مه له اوباما څخه رسماً د سپینې ماڼۍ واګې واخلي.
