بامیانو کې یو شمیر استادان، زده کوونکي او د کانکور ګډونوال د دري او ټولنپوهنې پوهنځیو د له منځه وړلو په اړه ډېر اندېښمن دي، وایي، چې د سږني کال د کانکور ګډونوال د همدې امله په ازموینه کې ګډون نه کوي.
شریفه محمدي چې د ۱۲ ټولګي څخه فارغه شوې او د بامیان پوهنتون ته د کانکور په ازموینه کې د ګډون له پاره نوم لیکنې ته راغلې وایي، چې په دې پوهنتون کې د دوو څانګو د له منځه وړلو له امله په سږني کانکور کې ګډون نه کوي.
د دې په خبره، لوړې زده کړې باید په خپله خوښه او لېوالتیا وویل شي؛ خو هغه پوهنځی چې د دې خوښ وو؛ حذف شو.
اغلې محمدي د لوړو زدکړو له مسوولانو غواړي، چې د دغو دوو څانګو د بېرته فعالولو ترڅنګ، ځېنې نورې برخې چې خلک ورسره لېوالتیا لري؛ په دغه پوهنتون کې فعال کړي.
په همدې حال کې د ادبیاتو څانګې د دري برخې زده کړیال عبدالحمید ابراهیمي چې اوسمهال د بامیانو په پوهنتون کې د ورځې له خوا په زده کړو بوخت دی؛ له دې پوهنتونه د دري ډيپارټمېنټ لرې کول یو لوی زیان بولي.
خو د بامیانو د پوهنتون رییسې معصومې خاوري سلام وطندار ته وویل، چې د بامیانو پوهنتون د شپې څانګې څخه د دري او ټولنپوهنې برخو له منځه وړلو لامل د یوې مودې له پاره د لوړوزده کړو وزارت له خوا د بودیجې کمول دي او هڅه کېږي، چې په راتلونکي کې دا برخې بېرته فعالې شي.
په همدې حال کې د بامیانو پوهنتون د دري څانګې یو شمېر استادان د دغې ستونزې په غبرګون وایي، چې د لوړو زده کړو وزارت او د بامیانو پوهنتون مسوولان باید په کانکور ازموینه کې پر زده کړیالانو په جبري توګه څانګې تحمیل نه کړي.
د بامیانو د دري ډیپارټمېنت امر روح الله دانشیار سلام وطندار ته وویل، چې د هېواد په مرکزي حوزه کې اکثر کسان شته چې غواړي په دري ادبیاتو کې زده کړې وکړي.
ویل کېږي چې د بامیانو ولایت د شپنیو پوهنځیو له پاره د کانکور سږنۍ ازموینه د تلې پر ۲۳ نېټه اخیستل کېږي، چې شاوخوا ۵۵۰ کسان په کې ګډون کوي.
د بامیانو پوهنتون د مسوولانو پر وینا، اوسمهال په دغه پوهنتون کې شاوخوا ۱۶۰۰محصلان د شپې څانګه کې درس وایي، چې ډېر هغه یې دولتي کارکوونکي دي.
